Lemmy a liam; Motorhead an mang!

Heavymetal tuipui ngaihsan rawn ni ṭhin, Motorhead khaipa Ian Fraser Kilmister, 'Lemmy' tia an koh chu December 28 khan cancer vangin a thi. Motorhead drummer Mikkey Dee chuan an band chu an tawp nghal tur thu a puang zui nghal.

Kum 70 mi lemmy hi bassist thiam tak a nih piah lamah mipui ngainat hlawh tak a ni a, zaithiam tak a ni tel bawk a, British rock star ropui ber zinga mi a ni. Tun hnaiah a hriselna a ṭha vak lo a, a natna tak an hmu chhuak lawk lo a, cancer a ni tih an hriat chhuah hnu ni hnih lekah a chenna Los Angeles-ah a thi ta a ni.

Motorhead hian kumin kum-tharah hian tour nei turin inbuat^-saihna an nei nual a; nimahsela an khaipa ber a boral takah chuan an drummer Mikkey Dee chuan, "Motorhead a tawp tawh. Motorhead chu Lemmy kha a ni. Kan band hi kan tawp tawh a, mi tam tak thinlungah erawh kan nung reng ang," tiin a sawi.

Heavy metal khawvelin a ngaihsan rawn Motorhead hi thrash leh speed metal lamah chuan a sulsutu zinga mi an ni a, 1975-a din kha niin studio album 23 zet an tichhuak a, an hla thu leh an rimawi kalhmang avangin lawm an hlawh ṭhin hle.

Lemmy hian a tirah chuan 'rock and roll' band an nih thu a sawi ṭhin a; nimahsela an rimawi kalhmang danglam tak avangin 'hard core heavy metal' nin mi tam berin an ngai a, tun hnaia band lar ta tam takte hi Motorhead ngaisangtu an ni a, chung zingah chuan Metallica-te pawh hi an tel.

An album zingah Overkill, Bomber, Ace of Spades leh No Sleep 'til Hammersmith-te chu a lar zual an ni a, VH1 lamin 100 Greatest Artists of Hard Rock an thlan chhuahah 26-na an ni phak a, kum 2012 thleng khan an album hi maktaduai 15 zet an hralh tawh.

An rimawi tum ṭhin hi mi zawng zawng duhzawng a ni hauh lo a, a ngaina lotu tan chuan 'bengchheng' mai an chang a; nimahsela a tuipui tawh chin chuan an âtchilh a, an rimawi kalphung avang hian rimawi khawvel chanchin ziaknaah an chuai tawh dawn lo a ni.

Lemmy hi December 24, 1945-ah Staffordshire, England-ah a piang a, a naupan lai aṭanga rimawia tui tawh a ni. A naupan deuhlaiin Beatles che vel hi Liverpool khuaah a lo thlir fo tawh a, Jimi Hendrix-a recording puitu zingah pawh a lo tel tawh a, khawvelin a hmelhriat hmain khawvel huapa rimawi lama mi ropuite a lo hnim hnai hma hle a ni.

Kum 1971-ah British band Hawkwind a zawm a, he band aṭanga an ban hnu lawkah Motorhead hi a din ta a, khawvel hriat lar musucian hlawhtling a ni a, a thih ni thlengin he band khaipa ber hi a ni ta zel a; a thih rualin Motorhead pawh an vui liam ve ta a ni.