Khawvel pumah social media hmangtu mi tld 4.9 awm

Google sheets-based revenue operations platform, Demand Sage-in zirchianna a neihah, kum 2023-ah khawvel pumah social media hmang mi tld 4.9 awmin, khawvel puma mihring awm zat aṭanga 60.49% an tling. Kum 2027-ah chuan tld 5.85 an tling chho turah a chhut bawk.

Social media platform zingah Facebook chu hman nasat ber niin, monthly active user (MAU) hi hi tld 3.03 an tling a ni. WhatsApp chuan dawtin MAU hi tld 2.7 an awm a, YouTube chu pathumnaah awmin MAU tld 2.7 an awm bawk. Instagram hmangtu hi tld 2.5, WeChat tld 1.67 leh TikTok tld 1.67 niin, Telegram hmangtu mi mtd 700 an awm.

Ram hrang hrang zingah social media hmangtu tam zualna chu - China-ah mi tld 1.02, India-ah mi mtd 755 leh USA-ah mi mtd 302 an ni. Region-ah chuan Eastern Asia-ah tam berin, khawvel puma social media user zinga 26% an awm a, Central Africa bialah tlem berin, 0.46% an awm a ni.

Chawhrualin mi pakhatin social media-ah nikhatah darkar 2 leh minute 35 zel hun hman ang a ni. Social media platform hmang nasa zualte hi Millennial leh Gen Z-te niin, a tlangpuiin mi pakhat hian platform 6 - 7 inkar a hmang kual ṭhin.

Social media user zinga 54% chu mipa niin, hmeichhia 46% an awm. Facebook hmangtu hi mipa 56.6% leh hmeichhia 43.4% niin, Instagram hmangtu mipa 50.7% leh hmeichhia 49.3% an ni a, SnapChat hmangtu zingah hmeichhia 53.8% an awm thung.

Millennial leh Gen Z zingah chawhrualin mi pakhatin social media account 8.5 zel nei anga chhut a ni. Social media hmang ṭhin zingah Japan-ah mi pakhatin account 3.8 nei ang niin a hniam ber a, India chu sang berin user pakhatin account 11.5 nei zel ang a ni.

2023-ah Social media advertising market-a advertisement tihna atana sum sen hi USD tld 226.00 tling tura chhut a ni a, kum 2027-ah USD tld 384.90 a tlin chhoh rin a ni bawk.