‘Keimi’ film promo video tichhuak

Mizo pipute hun lai behchhana siam, 'Keimi' film promo video chu tihchhuah a ni ta a, November thlaah film hi tlangzarh hi ni ang.

Traditional fiction a nih angin he film hi entir nei lam hawia siam a ni lo a, a hmuhnawm thei ang ber tura duan a ni. A thawnthu hi Christo Pa, Dawm Pachuau leh Aba Hmar-te ziah niin, video hi B Lego Picture kutchhuak tur a ni.

A changtu turte hi Tlangpui nula hmelṭha Zonuni leh Khawhai tlangval Zova te an ni dawn a, film industry lamah hnuhma la nei tam lo mah se promo video aṭangin an thiam zia a hmuh theih nghal. A changtu lamte mi thar hlang deuh ni mah se a buatsaihtute lamah film lama sulhnu ṭha tak lo nei tawh, K. Lalawmpuia, Lr Tochhawng leh tawnhriat nei ṭha tak takten an kaihhruai avangin 'Keimi' film hi a nep dawn lo.

Mizo pipute sulhnu behchhana siam a nih avangin a buatsaih pawh a hautak a, Mizo film chhuak thar awm nual tawh mah se hetiang lam hawi tihchhuah hmasak ber a nih dawn avangin a nghahhlelh awm viau.

'Keimi' hi November thla chhung show kalpui a ni dawn a, December thla lamah chauh streaming app lamah dah chhuah a ni ang. Inhlawhna leh sum tuakna atana hmang duhte tan booking tih lawk theih a ni.