Naktukah American Idol tawpna a intan dawn ta!

'Telivision khawvela nghawng nei na ber' tia an sawi American Idol season 15-na chu baktuk, January 6 hian an ṭan dawn a, hei hi a tawpna tur a ni nghal ang.

Dan pangngaiin host Ryan Seacrest chuan he TV show hlawhtling tak hi a kaihruai leh dawn a, judge-ah Jennifer Lopez, Keith Urban leh Harry Connick-te an ṭang leh ang. Season awpna ber a ni bawk a, he show hlawhtlinna tura thawh hlawk tak an original judge pathum Paula Abdul, Simon Cowell leh Randy Jackson-te pawh tun season chhung hian inlan vek tura ngaih an ni.

January 6 hian Denver, Colorado lama an intihsiakna chu TV-ah an pe chhuak ṭan dawn a, he mi ni vek hian Savannah, Georgia lama inelna pawh TV-ah hmuh theih a ni ang.

Kum 2002-a American Idoil bul ṭan a nih aṭang khan khawvelin he reality show hi a atchilh a, Simon Fuller-a ngaihtuah chhuah inelna hi kum 2003-04 aṭanga 2010–11 season thleng khan US TV rating-ah chuan entu tam ber a ni a, kum riat chhung zet American mipuite hmuhnawm tih ber a ni. Hun a kal zel a, American Idol chu US mipuite chuan ngaiah an nei ṭan a, hemi el phak tur hian American Idol pe chhuaktu Fox TV elpui TV dangte chuan intihsiakna TV show hmuhnawm tak tak an lo duang chhuak ve mek bawk si a, chuvangin he show hmuhnawm tak hi tihtawp zai an rel ta a ni.

American Idol hian hmuhnawm leh ngaihnawm kawngah he khawvelah hian hnuhma a hnutchhiah hrawl takzet a, zaithiam langsar ni zui ta Kelly Clarkson, Ruben Studdard, Fantasia Barrino, Carrie Underwood, Taylor Hicks, Jordin Sparks, David Cook, Kris Allen, Lee DeWyze, Scotty McCreery, Phillip Phillips, Candice Glover, Caleb Johnson leh Nick Fradiani-te hi he inelnaa pakhatna lo ni tawh an ni a; anni ni lo zaithiam lar zui ta ṭhahnem tak an chher chhuak bawk.

Billboard magazine chuan, "Idol hian Billboard chart-topper 345 a chhuah tawh a, tun thleng hian Kelly Clarkson, Carrie Underwood, Daughtry, Fantasia, Ruben Studdard, Jennifer Hudson, Clay Aiken, Adam Lambert leh Jordin Sparks-te hi Tv khawvel luahlumtu an la ni reng a ni," tiin an ziak hial.

Ngaihtuahawm lo Seacrest

Judge-te hi chu zaithiam lar leh producer larte an ni thin a, an host ber Ryan John Seacrest hi American Idol tawp rual hian a thamral ve dawn em? A teuh lo. A la lar zual deuh deuh dawn pawh a ni mai thei!

Kum 41-a upa tlangval hian New Year's Rockin' Eve hi kum 2013 atang khan a host tan a, kumhlui thlah zan apiangin dollar maktaduai a hui lut niin an sawi a, zan khata a lakluh ringawt pawh a tam tham hle. Hei mai hi a ni lo, CNN chuan, "King of all media," nih a phu tiin an lo comment hial tawh. Ama idol ngei Larry King chuan Larry King show a host ṭhin chu a chawlh hunah Seacrest hian ama pualin he show hi chhunzawm se a duh thute a sawi hial tawh.

A thil neih hlutna hi dollar makraduai 330 vel ni tawhin an chhut a, American Idol hi tawp mah se Seacrest hi chuan tawp ve mai a la tum lo.