Kum 2015-a tuma tluk phâk loh

Kumin a ral leh hma chuan Adele kan ti leh reng a ngaih hmel a, tun thlengin a album 25 chu Billboard 200-ah pakhatna a la ni reng. Nikum chhunga US-a album hralh chhuah hnem ber pawh Adele album 25 hi a ni a, tuman an tluk pha lo.

November thlaa a tihchhuah chauh mah se Adele album 25 hi ph˚ng zinga piring vawrh ang mai a ni a, an inchuh a ni ber mai. Kum 2015 chhung khan copy maktaduai 7.44 zet a hralh thei a, kum khat chhunga album hralh hnem lamah kum 2004-a Usher-a album hnua hralh ṭhat leh ber a ni. Mahse Adele album hi chu thla hnih pumhlum lo chauh nikum chhung khan an zuar chhuak hman tih hria la.

Kum 2004 khan Usher chuan 'Confessions' album a tichhuak a, kha album kha hemi kum chhung hian copy maktaduai 7.98 zet a hralh thei a, Adele hian a khum ta lo. Mahse an zawrh hun rei zawng ngaihtuah chuan Adele hian a hralh ṭha zawk tho tho a tih theih. Kar liam ta pawh khan Adele album hi pakhatnaah bawk a la awm a, hapta ruk chhung chu a zawnin pakhatnaah a awm tawh. Kar liam ta chhung khan copy 363,000 zet a hralh belh leh.

Hla mal lamah pawh Adele bawk hi a chung berah a la awm zel. A hla 'Hello' chu US Billboard Hot 100-ah pakhatnaah a la awm a, November 15-a he hla a tihchhuah
aṭang khan Billboard single chart-ah hian pakhatnaah a la awm ngar ngar a ni. February aṭang hian Adele chuan 'Adele Live' tour a nei ṭan dawn a, a inbuatsaih mek a, concert a neihna tur hmun tam takah chuan ticket hralh zawh a ni tawh.