Rock and Roll Hall of Fame 2020 Lakluh turte hriat tawh

Rock and Roll Hall of Fame 2020-a lakluh turte chu Nilaini khan puanchhuah a ni ta a, Depeche Mode, The Doobie Brothers, Whitney Houston, Nine Inch Nails, The Notorious B.I.G. leh T-Rex-te chu kumin hian lakluh an ni dawn.

Rock and Roll Hall of Fame-ah hian artist emaw band emawte chuan nomination an hmuh hma kum 25 tal liam tawhah an commercial recording hmasa ber an tlangzarh a ngai a, nomination hmute chu vote hmanga thlanchhuah leh an ni ṭhin.

Khawvel ram hrang hrang aṭangin artist 1000 chuangin vote an thlak ṭhin a, chung zingah chuan Rock and Roll Hall of Fame lo dawng tawhte, historian leh music industry-a mi langsar tak takte an tel. The Doobie Brothers, Whitney Houston, Notorious B.I.G. leh T-Rex-te hian a ṭumkhatna atan nomination an hmu a, Rock and Roll Hall of Fame-a lalut tur hian vote thlaktute chuan an thlang tling nghal a ni. 35th Annual Rock and Roll Hall of Fame Induction Ceremony hi Cleveland, Ohio-ah May thlaah neih a ni dawn a, February 27 aṭangin ticket zawrh chhuah ṭan a ni ang. Induction Ceremony hi HBO chuan live-in a pechhuak dawn a ni.