Star Wars-in Titanic a rawn lehpel

JJ Abrams-a direct, movie ropui ni mek, Star Wars: The Force Awa≠ken chuan khawvel movie ropui Titanic dinhmun a rawn tiderthawng a, kanwg ṭhenkhatah a record siamte a rawn lehpel ṭan.

Titanic hian kum 1997 khan US bika sum lalut hnem ber dinhmun a lo hauh tawh a, movie dangin an lehpel thei ṭhin lo kha a nia, mahse Star Wars: The Force Awakens chuan a rawn lehpel thei ta der mai. Kar liam ta chhung khan The Force Awakens hian USD mtd 88.3 zet a lalut leh a, hengte nen hian US bika sum a lakluh tawh zawng zawng chu USD mtd 740.3 lai a tling tawh a ni.

Titanic khan US-ah USD mtd 658.3 zet a thawk chhuak a, kha kha movie dangin an khum hleithei lo a, The Force Awakens hian a rawn khum thei ta. US bika movie sum lalut hnem ber record a rawn siam a ni. US-a sum lalut hnem ber nihna a rawn hauh takah chuan Titanic chu pahnihnaah a tla thla a, Jurassic World chu pathumna a ni thung.

Hei mai bakah The Force Awakens hi movie history-ah, USD mtd 700 lalut tling hma ber a ni. Ni 16 lek chhungin USD mtd 700 zet a lalut hman. US kher lo, ram dangah pawh a hlawhtling em em a, kar tawp chhung khan USD mtd 184.6 zet a thawk chhuak. Inrinni khan The Force Awakens hian Avengers: Age of Ultron sum lakluh hnem lamah a rawn khum a, tunah hian khawvela movie tihchhuah tawha sum lalut hnem paruknaah a awm mek. The Force Awakens-in sum a lakluh tawh zawng zawng hi USD tluklehdingawn 1.51 a ni a, Age of Ultron khan USD tld 1.41 a ni.