Matthew West hnenah ASCAP Golden Note Award hlan dawn

Christian singer-songwriter, Matthew West chu Christian music industry lama a thawh hlawk em avangin 2023 ASCAP Christian Music Awards Celebration-ah chawimawina ngaihhlut tak, ASCAP Golden Note Award hlan a ni dawn.

ASCAP Golden Note Award hi songwriter, composer leh artist, Christian music industry tana thawh hlawk leh mel lung pawimawh tak thlentute hnenah hlan a ni ṭhin. He chawimawina lo dawng tawh zingah hian Garth Brooks, Michael W.Smith, Reba McEntire leh Mary Mary-te pawh an tel.

Matthew West hi ṭum nga Grammy nominee ni tawhin; Rascal Flatts, Scotty McCreery, Michael W. Smith, Amy Grant bakah artist dang eng emaw zatin a hlate pawh an lo sa tawh a ni. Album 11 a tichhuak tawh a, Christian Airplay hit-ah no. 1 hla 12 neiin, Hot Christian Songs chart-a no. 1-ah a hla paruk a lo lanpui tawh bawk. Kum 2018 khan GMA Dove Award-ah a hla phuah thiam avangin Songwriter of the Year hlan a ni tawh bawk a ni. Hemi hma hian Dove Awards pahnih a lo dawng tawh bawk.

2023 ASCAP Christian Music Awards Celebration hi October 2 hian Nashville-ah neih a ni ang.