David Bowie a thi
Hla phuah thiam, zai thiam, glam rock te, art rock, soul, hard rock, dance pop, punk leh electronica genre-ah te sulsutu leh mi ropui, David Bowie chu cancer avangin kum 69 mi niin a thi.
Tunlai ṭhangtharte zingah amah hria kan tam lutuk tawh lo mai thei a, mahse a hunlaia milar, tunlai thlenga influence nei hnem a ni. Kum 1947 January 8 khan London-a Brixton-ah a piang. Kum 1962 khan, kum 15 mi lek a nihin band a din tawh a ni.
Kum 1966 khan a hming tak David Robert Jones chu David Bowie tiin a thlak a, hetihlai hian saxophone a tum ṭhin a, band hrang hrang a pui ṭhin bawk. Kum 1969 khan Mercury Records-ah a inziaklut a, hemi kum hian Man of Words, Man of Music album a ti chhuak nghe nghe. A rawn lar tak tak ṭanna chu kum 1972 kha a ni. Hemi kum hian The Rise and Fall of Ziggy Stardust and the Spiders From Mars album a tichhuak a, hetah hian British music leh Japanese kabuki style a chawhpawlh a, a thiam bawk a, a hlawhtling hle. He album a hlawhtlin a, miin an ngaihven theih nan chanchinbuin an kawmnaah gay a nih thu a puang chhuak a, mahse a tak takah erawh chuan a ni lo.
US-a a ropuina tak tak thung erawh chu hemi hnu kum thumah a ni. Kum 1975 khan 'Fame' hla chu a malin US-ah a tichhuak a, a hlawhtling hle a, pathumna hial a kai pha.
Hemi hnu hian album hit leh hla ropui tak tak a tichhuak chho zel a, studio album a tihchhuah tawh zawng zawng hi 28 lai a tling. Hei bakah hian film hrang hrangah a chang tawh bawk. BBC-in kum 2002-a 100 Greatest Britons a thlan chhuahah khan Bowie hi 29-naah a lang pha a, kum 2004 khan Rolling Stone chanchinbuin 100 Greatest Artists of all Time a thlan chhuahah 39-naah a lang a, Best Singers of all time a thlan chhuahah 23-naah a lang bawk. Music khawvela a hlawhtlinna avang hian kum 1996 khan Rock and Roll Hall of Fame-ah lakluh a ni.
Kum 2006-a New York-a a zai bak kha chu live-in a perform leh ta miah lo. Kum 2014 khan cancer a ni tih hmuhchhuah a ni a, hemi hnu hian uluk takin enkawl mah se, a cancer natna avang hian a thih phah ta a ni. A thih hian a chhungten an dawn hlum.