Miss Universe Pageant-ah a ṭum khatna atan Pakistan tel dawn
Kumin November thlaa El Savodor-a 72nd Global Miss Universe Pageant neih turah Pakistan chuan a ṭum khatna atan an ram aiawh tur a tir ve dawn.
Kar liam taa 'Miss Universe Pakistan' atana thlan, kum 24 mi model Erica Robin chuan Miss Universe thlan turah hian an ram ai a awh dawn a ni. Erica Robin hi Karachi-a piang, Kristian chhungkua an ni a, kum 2020 July thla aṭangin modelling lamah lutin, Pakistan-a fashion brand lar - Khaadi, Zara Shahjahan, Sania Maskatiya, Eland leh Sana Safinaz-te fashion show buatsaihah pawh a lo inlan tawh a ni. Tunah hian Karachi-a IT consulting firm, Flow Digital-ah Assistant Manager a ni mek bawk.
Miss Universe Pakistan thlannaah hian contestant panga an tel a, he event hi Dubai-base company Yugen Group-in a buatsaih a ni.