Indian Oil Corporation-in an CSR aṭanga bus an lei chu nimin khan CMO tualah chief minister Lalduhoma'n Ephatha Special School for the Deaf & Hard of Hearing hnenah a hlan. CM chuan, IOC-in Mizorama tuialhthei dah khawlna (oil depot) an din thuai an beisei thu a sawi.
CM Lalduhoma chuan, Mualkhanga gas bottling plant chu IOC-in an tilian mek tih sawiin, "He an hmalakna atan hian sorkar pawhin ram zau tak kan hawhtir a ni. Mizoramin oil depot ṭha a mamawh avangin IOC-in depot an dinna tur hmunhma pahnih kan kawhhmuh a, an rawn thlana hna an ṭan thuai kan beisei a ni," a ti.
IOC chu kum tina Mizoram sorkara chhiah chhung lut tam ber pawl an nih thu sawiin Lalduhoma chuan, "Kum khatah cheng vbc 170 vel zet chhiah an chhûng lut ṭhin," a ti a; Covid len laiin Mizoram sorkar hnenah dialysis khawl 21 leh Covid vei damlo enkawlna tur khum eng emaw zat an pek bawk thu a sawi.
Chief Minister chuan, Ephatha School tana IOC-in bus ṭha tak an pe chu a lawm thu sawiin, "Spastic Society tan kuminah bus pahnih pek an tum bawk a, an hnathawh leh thilpekte hi kan tan a hlu a, an chungah ka lawm hle a ni," a ti.
Bus inhlannaah hian IOC deputy general manager (LPG-engineering) Z Lhungdim, senior manager Kuldip Sarma leh Malati Malakar te, Ephatha Society hruaitute, Special School zirlai naupangte leh thawktute an tel.
Ephatha Special School tana bus pek hi registration senso chu Chief Minister-in a tumsak dawn a, insurance bik chu TATA dealer Zothantluanga'n a tumsak dawn a ni.
