Nimin khan Home minister K Sapdanga hoin a pisaah Krismas leh kumthar vuakvêta dan leh thupek kenkawh dan tur sawiho a ni. Home Minister chuan, dan leh thupek kengkawh turin ṭanrual a ngaih dawn thu a sawi.

Ṭhutkhawmah hian Home Minister hi Excise & Narcotics minister Lalnghinglova Hmar-in a ṭawiawm a; Home department leh Excise & Narcotics department-a officer te, Aizawl Municipal Corporation (AMC) corporator te, Aizawl DC aiawh leh Central YMA hruaitute an tel.

Home Minister chuan, Mizote hunpui a thleng dawn hnai a, boruak muanawm tak hnuaiah hunpui hman a nih theih nan ṭanrual a ngaih thu a sawi a, "Kan ṭanrual chuan thil ṭha zawk a chhuak thei ang. Police, Excise, CYMA, DC leh AMC aiawhte kan kal khawm a, kan zavaia thawhhona hian rah ṭha a chhuah ngei ang," a ti.

Lalnghinglova Hmar pawhin thu sawiin, tun hnaia Mizorama ruihhlo donaa ṭanrualnain rah ṭha a chhuah thu a sawi a; Operation Trident hmangin ruihhlo zuar liante man chhuah an nih thu sawiin, official report-a lang lo, Operation Trident-a Excise & Narcotics department hnathawh dante a tarlang.

IGP Ramthlengliana chuan, Mizoram Police-in Operation Peace Christmas & New Year kalpui an tum thu sawiin, hunpui laia venhimna kalpui dan tur an ruahman dante a sawi bakah, Operation Jericho-2 kalpui a nih thu a sawi. Aizawl SP Zosangliana chuan, Aizawl chu zone paliah ṭhenin, sector 18-a duty turin ruahmanna an siam thu a sawi bawk.

Excise & Narcotics commissioner Z Lalhmangaiha chuan, hunpui laiin END-a thawkte chawlh (leave) lâk an phal loh thu leh, tuna thawk mekte bakah, training mekte nena thawk chhuak tura an inruahman thu a sawi.

CYMA aiawhte chuan, sorkar ruahmanna awm apiang an thlâwp theih thu te, ruihhlo ngai Aizawl lûn laia pungkhawm ṭhin hnawh darh bakah, a ṭul anga ruihhlo ngai enkawlna hmunah (rehabilitation home) dah an tum thu an sawi. Kum hmasa lama Police leh END te nena an thawhhona chhunzawm zel ṭha an tih thu te, ruihhlo dotu Zonal Anti Drugs Squad bakah, YMA branch-te'n ṭan lâk an tum thu an sawi bawk.

AMC aiawhte chuan, Aizawl neitu an nih angin a ṭul apianga chet chhuah an inhuam thu an sawi a, "AMC hminga tih ve theih a awm chuan kan inpeih reng a ni," an ti.

Sawihonaah hian, khawpui lûn lai leh hmun pawimawh bikte chu tun aṭanga chhun zan zawmin uluk taka vên a ṭhu thu sawi a ni a; Winter Festival vuakvêtah himna ngaih pawimawh a ṭul thu sawi niin, hma latu tur an din nghal a ni.