Mizoram Police chuan April 27, 2026-a sorkar hriattirna anga Office Memorandum lem siama thehdarhtu Lalramhlua (18), Upper Republic, Aizawl chu nimin khan an man.
Police thuchhuah tarlan danin, ruahsur nasat vanga April 27, 2026-a General Administration Department-in sorkar chawlh a puanna ni àwm tak Office Memorandum No. F-23012/36/2025-ESTT-CSD, ni 27 April 2026 chu April 27 khan social media hrang hrangah thehdarh a ni a, mipui tan buaina nasa tak a chawk chhuak.
Document-ah hian Irene Zohlimpuii Chongthu, Additional Secretary, GAD hming a chuang a, Ch. Lalnunkima, deputy secretary, GAD-in digital signature-in hming a ziah hnan angin a lang. GAD document lem thehdarh chungchangah hian GAD under secretary Christina Lalmuanzuali chuan Cyber Crime Police Station-ah FIR thehlutin, dan anga hma la turin police a ngen a ni.
Mizoram Police chuan CCPS Case No. 17/26 dt 27.04.2026 u/s 336(3)/353(1)(b) BNS 2023 ziak lutin an chhui nghal a; document lem siama vawrh darhtu Lalramhlua (18) s/o Michael Lalramchhana, Upper Republic chu nimin khan an man a ni.
Sorkar document siam danglam emaw, siam chawp leh theh darh chu dan kalh a nih thu tarlangin Mizoram Police chuan, "Hetiang thil lakah hian mipuite fimkhur hle turin kan inchah a. Lo inhnamhnawihte chungah dan anga na taka hma lak zel a ni dawn," an ti a; social media (Facebook, Instagram, Whatsapp etc) hmanga an thil thawn darhah fimkhur lehzual tur leh thu dik finfiah hmasa ṭhin turin mipui an ngen bawk.
