Chaw, sa, thlai leh oil-a intodelh turin senso sang mah se kan kal dawn - CM

Mizoram Horticulture Service Association (MHSA)-in nimina Aijal Club-a inkhawmpui an hmannaa khuallian, Horti­culture department enkawltu Chief Minister chuan thu sawiin, Mizoramin hectare 70,000 chuanga zau leilet (WRC) siam theihna a neih thu a sawi a, "Buh leh thil dangah thingtlang lo nei miah loin mechanise-in kal ta ila, Zoram hi rice, wheat, vegetables leh thil danga intodelh vek theihna Pathianin WRC area min pe, chu chu kan kutah a awm. Thlai leh a ken tel thil dangah export (thawn chhuah) tham nei turin ram kan nei," a ti.

An target-ah, chaw, tlai, sa leh oil-ah kan intodelh tur a nih thu sawiin Zoram­thanga chuan, "Khuta pawn lama mite'n political thil eng emaw a lo awm a, min rêp châr theih a, lal­ṭin ang maia duh huna min herh sàn a, min herh hniam theih turin kan awm tur a ni lo," a ti a; kawng hrang hranga intodelh turin senso (production cost) a sang a nih pawhin an kal hrim hrim tur thu a sawi.

CM Zoramthanga chuan, chawa intodelh ringawt chu hmasawnna a tlin loh thu sawiin, "Kan pipute pawh an intodelh thawkhat, development a tling lo. Economy a san a ngai. Economy-ah kan asset pui ber chu mipuiin kan insem pawha a mipui, a lêt hnih lêt thuma min châwm zo ram ṭha em em kan nei. Chutah chuan eng nge kan chìn ang a, eng nge economy siam tur kan dah ang," a ti.

Zoramthanga chuan, century (kum zabi) khat deuh thaw chu pipute'n thlai tlem chíngin ran tlém an vulh tih sawiin, "Survive (nun khawchhuah) dawr dawrna tur chuan kan kal a, economic development-ah chuan engmah a ni lo," a ti a; sorkarin economy sang takah dah an tum thu a sawi.

Khâwl nena chêt theih lohna tlang ramah chìn tur an ngaihtuah thu sawiin CM chuan, "Aieng te, sawhthingte pawh a rate ṭhat ṭum chuan a ṭha, nuai tél kan la. Chíng nawn leh tur chuan chul rih a ngai, a nih loh chuan kum tin shifting cultivation a ngai. Kha chu kan kal dawn lo. Vawi khat thlai kan chìn tawh chu kum 10/20/30 a hman theih tur a ni a, chumi tur chu kan dap," a ti.

Chief Minister chuan, thlai chìn tur atan production (thar chhuah), transporation (kalkawng), processing (sawngbawlna) leh market oriented (hralhna) mil thei tur thlan a ngaih thu sawiin, "Chu miah chuan rubber (ṭhelrêt), serthlum lam, kuhva leh maute pawh a ṭha a, theihtawpin kan kal chhohpui ang. Hmun sang, a tam berah kan chìn theih tur chu kan bamboo a ni," a ti a; mau/rua chìn tur an hmuh chhuah tawh thu a sawi.

Rua chungchangah sorkar laipui an bangbo nia sawiin Zoramthanga chuan, "Tunah chuan ka lawmna pakhat, NITI Aayog Vice Chairman kan hmin hneh ta. India ram pawhin an hre ṭan ta. NITI Aayog Vice Chairman chuan February 24 hian Guwahati-ah NITI Aayog meeting an ko leh a, lo kal la, lecture i rawn pe tur a ni, sustainable develop goal kan neih theihna turin a ti a ni," a ti.

Chief Minister chuan, raw project chu Delhi lamin pui lo mah se, state budget-in an tih dawn hrim hrim thu a hrilh tih sawiin, "Tichuan, in bánah kan rawn kai chho che u ang a, Aizawlah erawh hei hi kan thil tih a ni. Min pui emaw, pui lo emaw, kan kal dawn. Arunachal-in, Nagaland-in an duh ve, Meghalaya-in an duh ve tiin kan rawn hrilh dawn che u ka ti a ni," a ti a; Mizoramin bul an ṭan tur thu a sawi.

MHSA inkhawmpui hi an president Vanlal­nun­tluanga'n a kaihruai a; Horticulture Development Board vice chairman Prof. F Lalnunmawia, Bamboo Development Board vice chairman Dr K Pachhunga leh Horticulture secretary JC Ramthanga te pawhin an hmanpui. Chawhnuah ro an rel a ni.