Jal Jeevan Mission hnuaiah training

PHE department chuan Jal Jeevan Mission (JJM) hnuaiah January 29-31, 2020 chhung khan Aibawk khuaah thingtlang khaw tina tui thianghlim hnianghnâr leh faina lamtluang zawh dan tura ruahmanna thar zirtirna an buatsaih a; Aibawk RD Block huam chhunga khaw 20 aṭangin WATSAN Committee member mi 50 an tel.

Sorkar laipuia Ministry of Jal Shakti chuan JJM hnuaiah thingtlang khaw tina tui thianghlim hnianghnâr leh faina lamtluang zawh dan tura ruahmanna thar zirtirna hi India ram hmun tinah nei turin a ruahman a; Aibawka neih hi Aizawl district-a a hmasa ber a ni.

Training-ah hian Village Level Action Plan siam dan turte zirho a ni a; tui thianghlim hnianghnâr nei tura tuihnâr humhalh a ṭul dan te, fai leh thianghlim turin mumal taka bawlhhlawh senghawi a ṭul dan leh a taka hmalak dan tur te, WATSAN Committee account vawn dante an inzirtir a ni. Maubuang khuaah field training an nei nghal bawk.