Central sum hai luh dan tur sawiho

Industries department tihhmasawn dan tur leh sorkar laipui aṭanga sum tam zawk hâi chhuah dan tur ngaihtuahin nimin khan Industries minister H Rohluna hoin a pisaah Dara Shaw Consultancy, New Delhi leh Industries officer-te an ṭhukhawm.

H Rohluna chuan, Mizoram sorkarin industry lama hmasawn zel turin theihtawp a chhuah tih a sawi a, "Tunah hian ruahmanna tam tak kalpui mek a ni a, Industries department leh mipuite'n an chhawr tangkai theih tur ruahmanna tam tak siam a ni. Ruahmanna siamte hi sorkar laipuiah chak tak a bawhzui mek zel a ni," a ti.

Meeting-ah hian ministry hrang hrang hnuaia project kalpui dan tur leh sorkar laipui budget aṭanga sum a tam thei ang ber hmuh theih dan tur ngaihtuahin an sawiho a; scheme hrang hrang textile, medium, small & micro enterprise leh local processing hnuaiah a tam thei ang ber kalpui dan turah ruahmann an siam a ni.

Meeting-ah hian parlia-mentary secretary (Industries) Joseph Lalhimpuia, Industries secretary Zothankhuma leh Planning secretary Dr C Vanlalramsanga te pawh an tel.