PwD Commissioner báng turin an ngen

Mizo Students’ Union (MSU) gen.hqrs. chuan nimin khan Persons with Disabilities (PwD) commissioner B Sairengpui chu a nihna aṭanga báng tura ngenna lehkha an pe.

MSU chuan an lehkhaah chuan, dam leh hrisel taka sorkarin hnathawka a chhawr theih hun chhung, kum 60 a tlin thlenga a thawk thei chu an lawmpui thu leh ram leh hnam tana a thawh tawhnate avangin lawmthu an hrilh a; chutih rualin, a pension hnua kum thum chhung sorkarin PwD Commissioner atana an dah tawh hnua kum hnih dang atan a dah leh chu hnawla báng turin an ngen a ni.

MSU chuan, "I pension hnuah sorkarin PwD Commissioner atan kum thum chhung an ruai nawn tawh che a, i hnuaia officer-te leh ṭhalai lehkhathiam zawkte tan he hna hi i ken kan lo beisei tawh laia kum hnih chhung, 2015-17 thawk tura chhawr zui tur i nih lehna appoinment order hi i chhia leh ṭha hriatna hmang pawha i hnâwl tawh kan lo beisei laia office i la luah tlat hi mihring ngaihtuahna leh dan hmang pawha thil dik lo leh ṭha lo tak a nih avangin báng ngam turin kan phût che a ni," an ti.

MSU hian nimin vek khan Mizoram sorkarin PwD commissioner B Sairengpuii kum hnih chhung atana a rawih nawn lehna appoinment order a siam chu MSU office kawtah a copy an hâl a ni.