Mizorama Covid-19 vei zat 628

August 10, Thawhṭanni leh nimin khan Rapid Antigen Test hmangin Covid-19 vei mi pariat hmuh chhuah thar a ni a, Mizorama hripui vei hmuh tawh zat chu 628 an ni. Zoram Medical College laboratory-a mi 95 leh Lunglei Civil Hospital (LCH) laboratory-a mi 15 endikte erawh chu hripui lakah an fihlîm vek thung.

Mizoramah Covid-19 vei mi 628 hmuh chhuah a ni tawh a, chu'ng zinga mi 323 (51.43%) chu chhuahtir tawh niin, mi 305 (48.57%) an la chhuak lo. Enkawl mek zingah hripui vei tawh lo (negative tawh) tih finfiah mi eng emaw zat an awm nia thu dawn a ni.

Rapid Antigen Test hmanga Covid-19 vei hmuh chhuah tharte chu Kolasib district-a hmuh chhuah mi pasarih leh Aizawl district mi pakhat an ni a, hripui vei vangin harsatna (symptom) an nei rih lo.

Kolasib district-a hmuh chhuah mi pasarih zinga pakhat chu Vai­reng­te checkgate-a Excise & Narcotics depart­ment duty lai kum 37 mi a ni a; mi dang paruk hnam dang, truck enkawltute an ni thung. Aizawl district-a hmuh chhuah mi pakhat chu mipa kum 40 mi, Assam aṭanga lut a ni.

Vairengte checkgate-a duty zinga pakhatin Covid-19 a vei tih hmuh chhuah a nih hnuah a kài chhàwn theih àwma ngaihte chhui hna (contact tracing) tih nghal a nih thu, sorkar thuchhuah chuan a tarlang.

August 10-a ZMC-a mi 95 endik zingah ZMC/SRH-a awm mi 15 an tel a, LCH laboratory-a True­NAT-PCR hmanga sample 15 endik zingah LCH-a thawk mi 11 an tel bawk.

Health department-a driver pakhatin Covid-19 a vei avangin nimin khan Aizawl East CMO-a thawk mi 62-te leh mi dang pali, an vaiin mi 66-te chu Rapid Antigen Test hmangin endik an ni a,  nimin vek khan Aizawl West CMO-a thawk mi 33 endik a ni bawk a; hripui vei hmuh an awm lo.