IPR leh MJA-te inkâwm khawm

Information & Public Relation (&PR) department leh Mizoram Journalist Association (MJA) member-te chuan nimin khan IPR Conference Hall-ah kum thar puala lawmthu sawina leh thingpui inhona an buatsaih a, IPR secretary Thanhliri Pachuau-in a hmanpui.

Thanhliri Pachuau chuan, hun vawn dik kawngah mahni inthunun a pawimawh tih sawiin, "Kan hnathawhnaahte hun vawng dik a, rinawm tak leh taima taka kan thawh theihna tur hian keimahni mai bakah kan chhungkuaah pawh kan ṭanho a ngai. Keimahni'n kan zir chuan kan hnuaia mite'n harsa lo takin an zâwm ve mai ṭhin. Office hna kalsana mahni ṭul kan ngaih pawimawh lutuk chuan kan hnain a tuar a, chuvangin, kan hna hi hmasa berah leh pawimawh berah kan dah tur a ni," a ti.

MJA president Vanlalrema Vantawl chuan, "India ram state dangte ngaihtuahin MJA-te hian welfare ṭha tak kan nei a, state dang journalist-te pawhin MJA kalphung an rawn zawt fo. IPR department nena thawhona kawngah Mizoram tluka thawhhona ṭha a tam lo ang a tih theih," a ti a; IPR department-in hma an sawn a, an ṭhan zel chuan MJA pawh a ṭhan zel tur thu a sawi.

Inkhawm kaihruaitu, IPR director Jim K Chozah chuan, MJA member-te chu ram tana thawnaah thinlung inpawh taka thawhhopuiah a sawm a ni.