MBSE-a thawk mi pali 'black list' an ni

MBSE Chairman chuan, Higher Secondary School Leaving Certificate 2020 result dik lo chungchanga hmalakna sawiin, "July 20, 2020-ah MZP office bearer-te an President hoin an lo kal a, Chairman chamber-ah Secretary leh Controller of Examinations-te'n an lo hmu a, chutah chuan HSSLC 2020 Top 10 result dik lo chhui chhuak a, ti dik lotute lakah action na taka la turin min ngen a ni.

"Hemi chhui tur hian deputy secretary Lalawmpuii ruat nghal niin, July 21, 2020-ah order chhuah a ni a, ni 15 chhunga chhui zo tura order pek a ni. July 24-ah MZP general secretary leh secretary pakhat thil awm dan ngaihvenin MBSE Chairman room-ah an lo kal leh a, July 21-ah order siamin, ni 15 hun pek a ni a, Inquiry Officer hian a report a la thehluh loh thuin lo chhàn a ni," a ti. 

F Lianhmingthanga chuan, "Inquiry Officer chuan August 3-ah a report a thehlut a, chu report chu ngun taka study a nih hnuah August 5-ah order tichhuakin, Examiner, Scrutinizer leh Tabulator-te chungah kan Minister zahawm takin a lo sawi tawh angin, tun hnu zelah exam kaihhnawih hna rêng rêng thawk tawh lo turin action lâk a ni a, black list an ni ta a ni," tiin a sawi. 

MBSE Chairman chuan, "He thil hi keini lamin sorkara kan controlling authority hnenah Action Taken Report kan pe a, chu chu MZP lam kan lo hrilh tawh si lo a, communication gap a lo awm palh ta a ni," a ti a; chumi avang chuan MZP-te'n press release an chhuah phah a, pawi an tih tak meuh thu a sawi.

HSSLC 2020 result dik lo chung­changa an hmalakna leh sorkar hmalak dan zawhna chhangin MZP president B Vanlaltána chuan, HSSLC result chhuakah dik lo awm avanga MZP-in hma a lakna kal zelah, August 10, Thawhṭanni tlai khan School Education minister Lalchhandama Ralte hoin a pindanah MBSE Chairman, Controller of Examination leh Secretary-te nen uluk taka an sawiho thu a sawi.

MZP President chuan, result dik lo chungchanga sorkar hmalak dante an sawiho tih sawiin, "Keini pawhin result dik lo vanga zirlaite tawrhna a awm avanga kan hmalak dan leh kan duh loh dante kan sawi. Hun rei tak kan sawiho hnuah sorkarin hma a laknate leh thil kal zel dante kan ngaihthlak hnuah, sorkar hmalakna chu a ṭha tâwkah kan ngai ta a ni," a ti.