Kuthnathawktute Ni hman a ni

Nimin khan Mizoram hmun hrang hrangah Mizoram sorkar bultumin 'Kut-hnathawktute Ni' hman a ni a, a hmanna pui ber Vanapa Hall-ah chuan chief minister Lal Thanhawla hoa hman a ni.

Chief Minister chuan, NLUP-in mi rethei tam tak tan malsawmna a thlen tawh tih sawiin, "Rinawmna, dikna, taimakna leh Pathian ṭihna nung nena kan thawh chuan kan hlawhtlinpui zel ang. Kut hnathawh hi hna ropui leh zahawm a ni a; kan ngai ropuiin kan ngai hlu tur a ni," a ti a; sum ngaina hnama Mizo hnam a chhuah loh nan kut hnathawh uar a pawimawh thu a sawi.

Democracy-ah mipui leh sorkar thawhhona ṭha a pawimawh tih sawiin Lal Than-hawla chuan, "Chuta tan chuan inpawh tawnna tan neih a ṭul a ni," a ti.

Chief Minister chuan, Mizote hnam ropui leh zahawm, ei leh bar bakah, sum leh paia intodelh ni turin a kalkawng tur sorkarin a ruahman vek tawh nia sawiin, "Hlawhtlinna tura theihtawp chhuah turin kan zavaia ṭan kan lak a ngai. Kut hnathawktute thar chhuah hralhna turin sorkarin a phâk tawkin ngaihtuahna a hmang reng a ni," a ti a; economic policy leh kalphung thar hman theih dan a ngaihtuah mek thu a sawi.

CM Lal Thanhawla hian 'Mizoram hmasawnna lamtluang' tih DDK programme, zanin dar 7-8 a tihchhuah ṭan tur a hawng nghal a; he programme hi chawlhkar tin Zirtawpni zan dar 7-8 inkarah DDK Aizawl chuan a tichhuak ṭhin ang.

Sorkar thuchhuah tarlan danin, sorkarin hmasawnna hrang hrang a kalpuite mipuite'n chiang zawka an hriat theihna turin NLUP kaltlangin DDK, Aizawl leh Mizoram sorkarin ‘Mizoram hmasawnna lamtluang’ tichhuak ṭhin turin inremna an ziak a ni.

Khualzahawm State Planning Board vice chairman H Liansailova chuan, roreltute chu rethei, pachhia leh hmeithaite tana ding tur an nih thu sawiin, "Chu chu kan hotute hian an zawm ṭha hle. NLUP hi khawpuiah aiin thingtlangah a hlawhtlinna a sang zawk a; a pumpuiah 44%-a hlawhtlingin, lo neitute’n theihtawp an chhuahna apiangah a hlawhtlinna pawh a sang zel a ni,” a ti.

NLUP aṭanga malsawmna hi Pathianin ram tana malsawmnaah a ruat a nih thu sawiin H Liansailova chuan, "Chu vang chuan tihhlawhtlin loh chu ‘Corruption’ a ni," a ti a, NLUP-ah thil ṭha hlir khungkhawmna a ang sawt niin a sawi.

Kuthnathawktute Ni hmanna inkhawm hi chief secretary Lalmalsawma'n a kaihruai a, minister R Romawia pawhin thu a sawi.

Mizoram University vice chacellor Prof. R Lalthantluanga'n MZU leh Minnesota University, USA thawh dun dan sawiin, UN programme coordinator chuan Mizoram sorkar leh UN Agencies-te thawhho dan a sawi thung. Chawhnu lamah MZU-a Prof. Lianzela kaihhruainain zawhna leh chhanna hun hman a ni.