AMC-in free wifi hman thuai beisei

Aizawl Municipal Council (AMC) chuan Aizawl khawpui hmun ṭhenkhata a thlawna wifi hman theih turin ruahmanna an kalpui mek a, peihfel thuai an inbeisei.

Vanglaini palai zawhna chhangin AMC mayor PC Lalhmingthanga chuan, free wifi atan theihtawp an chhuah tih sawiin, "Ṭum eng emaw zat hemi chungchang hi kan sawiho tawh a, ruahmannate pawh kan nei vek tawh. Mahse, Board of Councillor ṭhutkhawmah pass a ngai a, BoC
ṭhutkhawm hmasak berah ruahmannate pharh a, pass tum a ni ang," a ti.

PC Lalhmingthanga sawi danin, free wifi atan hian service provider hrang hrangte chuan AMC-ah free wifi kalpui an theih thute leh a senso ngai tur zatte an thehlut tawh hlawm. Hetih lai hian, AMC BoC-in Aizawl khawpui hmun ṭhenkhata free wifi dah an pawm chuan, tender chhuahin service provider zinga free wifi buaipui tur thlan a ni ang.

AMC sorkarna chang mek MNF chuan AMC inthlan atana manifesto an buatsaihah Aizawl khawpui hmun ṭhenkhata a thlawn wifi hman theih tura siam an telh a ni.

Zawhna chhangin AMC Mayor chuan, AMC sorkarin parking, drainage system leh kawng ṭha a ngai pawimawh hle tih sawiin, "Heng atan hian ruahmanna hrang hrang kan siam a, state sorkar nena ṭang tlanga hmalak dan turte kan ngaihtuah. Vawi lehkhata tih vek harsate a awm a, uluk taka kalpui kan tum a ni," a ti.

AMC hian mipuite'n office pan kher ngai loa form hrang hrang internet hmanga an download theih dan tur an duang a, chu chu hawn theih turin an peihfel ṭep tawh a ni.