District tinah Kuthnathawktute Ni hmang

Nimin khan Mizoram district headquarters tinah Mizoram sorkar bultumin 'Kuthnathawktute Ni' hman a ni a, minister, parliamentary secretary leh MLA-te'n an hmanpui.

Lungleiah chuan Saikuti Hall-ah minister Zodintluanga hoa hman a ni a; Zodintluanga chuan thâwk khat laiin Mizoramah kut hnathawktute an rûm tih sawiin, "Sorkarah pawisa tam tak a awm niin an hre si a, an chan tur awm loa an hriat avangin Aizawl khawpuiah chemsen lekin an fuankhawm a, thisen a chhuak a ni. Chutiang a thlen tawh lohna turin kan sorkarin hma a la a ni," a ti.

Congress a sorkar tirha an dah pawimawh ber chu kut hnathawktute tana budget siam a nih thu sawiin Zodintluanga chuan, "Kan sorkarin a ngaih pawi-mawh hmasak ber chu kut hnathawktute thleng phak budget siam a ni," a ti a; NLUP hmangin chhungkaw sang tam tak intodelhna thlen mek a nih thu a sawi.

Champhaiah chuan NLUP Implementing Board (NIB) vice chairman JH Roṭhuama hoin Town Hall-ah hman a ni a; Agriculture, Horticulture, Forest leh Fisheries department hnuaia NLUP second, third leh fourth phase-a beneficiary-te hnenah
ṭanpuina sem a ni.

JH Roṭhuama chuan, kut hnathawktute tel loin ramin hma a sawn thei lo tih sawiin, "Kum ruk pumhlûm NLUP kalpui a nih hnuah ran vulhahte hmasawnna ramin a hmu a, bawnghnute sawngbawlna ṭha takte neih a ni. Loneitute tan an thlai chin a puitlin hmaa eizawnna lailâwk dapsak te, thing leh mau tipung tura thing rah leh ṭiakte kui a tihpun bakah, lo vâta hnathawk zat zawi zawiin a kiam zel a ni," a ti.

Lawngtlaiah chuan CYLA hall-ah minister C Ngunlianchunga hoin hman a ni a; C Ngunlianchunga chuan, "Mizoram vanneihna chu sorkarin kut hnathawktute a ngai pawimawh a, an hmasawnna atan NLUP a duang chhuak hi a ni," a ti a, NLUP dawngtute tan hmasawn tura insiamremna hun remchang leh
ṭha chungchuang a nih thu a sawi.

Chawhnu lamah Lawngtlai khawpui leh a chhehvel khuaa NLUP third & fourth phase ṭanpuina dawng tura thlante hnenah ṭanpuina sem a ni.

Kuthnathawktute Ni hi Saihah chuan Laila Hall-ah hman a ni a, speaker Hiphei leh deputy speaker R Lalrinawma ten an hmanpui.

Speaker chuan, Mizoram sorkarin kut hnathawka eizawnna a ngai pawimawh ber tih sawiin, "He ni pawimawh hmanpui tur hian district tinah minister leh parliamentary secretary-te pawh tirh chhuah an ni," a ti. Dy. speaker pawhin, sorkarin eizawnna hrang hrangah kut hnathawhah eizawnna a ngai pawimawh ber tih sawiin, "Kut hnathawktute hian sorkar zar zo ber se tih hi sorkar rilru a ni," a ti a; kut hnathawktute tana ruahman NLUP sawisel chu mipuite rawngbawlna hlut thiam loh leh zah lohna niin a sawi.

Serchhipah chuan DC conference hall-ah minister H Rohluna leh MLA pahnih R Vanlalvena leh Vanlalawmpuii Chawngthu te hoin hman a ni.

H Rohluna chuan, mirethei leh eizawnna kawnga ṭanpui ngaite'n ei leh bar zawnna kawnga zalenna thar an chan a, Zoram khawvar thar leh hmasawnna thar a hrin theihna atana infuih tharna leh rilru thar kan put beiseina nei chunga kut hnathawktute puala hun hi buatsaih a nih thu a sawi a; "NLUP-a inhnamhnawih ve lo Central Agriculture Ministry hnuaia NABCONS-in NLUP hmalaknate uluk takin a vil reng a ni," a ti.

Kolasib-ah chuan Diakkawn YMA Hall-ah minister Lalsawta hoin hman a ni a; Lalsawta chuan, NLUP chu ṭanpui ngaite ṭanpui tur atana ram hruaitute'n mithiamte ráwn chunga an ngaihtuahna leh an rilru sênga an duan a nih thu sawiin, "NLUP ṭanpuina hi ṭanpuina satliah mai ni loin,
ṭang tura puihna a ni," a ti.

Mizoram chu ram nuam tak, boruak, sik leh sa ṭha tak nei leh remchanna ngah a nih thu sawiin Lalsawta chuan, "Mizote hi kan nêp lo a, thil engkim hi kan thiam chak a, ngaihtuahnain hma a hruaia, hmathlir kan tihzauha tih tak zeta hma kan lak ṭheuh chuan hlawhtlinna kan nei thei a ni," a ti a; tumruhte chu harsatnain a hneh thei lo tih a sawi.

Mamitah chuan Chhimveng YMA Hall-ah hman a ni a, minister Lalrinmawia Ralte-in a hman pui.

Lalrinmawia Ralte chuan, Mizoram sorkarin kut hnathawktute hlutzia leh pawimawhzia hriat thar lehna turin Kuthnathawktute Ni a buatsaih thu sawiin, "Mizoramah hun rei tak kut hnathawktute tana khua a thim hnuin, NLUP hmangin mi harsa zawkte khaichhuahna turin sorkarin nasa taka hma a la a, kut hnathawktu mi tam tak ṭanpui an ni. NLUP ṭanpuina baka kut hnathawktute ṭanpuina tur policy ṭha hi khawvel ram dangah pawh a awm bik lo," a ti.