Term hnih sorkar a harsa : Lalduhoma

ZNP president Lalduhoma chuan, Mizo-ramah a záwna term hnih aia rei sorkar thei an la awm lo tih sawiin, "Term hnihna hnuah chuan rorel lai party chu sum leh mipui ngah ber leh thuneihna chelhtu ni chungin kan la paih ziah a ni," a ti.

Nimina Zoram Nationalist Party-in kum 2016 atana an party pisa hawnna inkhawm an neihah thu sawiin, Lalduhoma chuan, party mite duhsakna dawnga hun rei tak chung party hruaina hna an chelhtir chu lawmawm a tih thu a sawi a, "Ka chunga rinna leh beiseina innghahte tihlawhtling thei loa vawiin ka thlenpui che u hi hrehawm ka ti khawp mai," tiin, a tihsual leh tlin lohnaah party mite ngaihdamna a dil.

Sorkar lai party-te chu term hnih an sorkar tawh chuan mipuiin an la paih zel tih sawiin, Duhoma chuan, mipuiin kum 1998-ah Congress sorkar leh kum 2008-ah MNF sorkar an paih dante a sawi a, "Tunah Congress-in term hnihna an hmang mek a, dinhmun derthâwng takah an ding mek a ni," a ti.

ZNP President chuan, Congress leh MNF-te chu rei tawk Mizo mipuite'n an hrawn ve ve tawh a, an hruaitute pawh an la ngai reng tih sawiin, "Kan duh loh sorkar thlâk nana kan duh loh tawh hnu tho lehburh sek mai hi 'Uiin a luak hnu a ei' an tih ang a ni," a ti. mipuite'n sorkar tura an duh ni loin, sorkar tura an rin an vote mai ṭhina a lan thu sawiin, "Mipuite'n kan duhthlanna kan hman thiam a hun ta hle mai," a ti.

Lalduhoma chuan, sorkar ding lai paih nan an paih tawh hnu chhar leh chíng tawh lo se a duh thu sawiin, "Sorkar theia kan rin ni loin, sorkar atana kan duh tihchak nachang hre tawh ila. Congress leh MNF insawichhe tawn reng mai chu ninawm tak zet tawh a ni," a ti a; mipuite chu inthlan leh hunah ZNP-te fiahna remchang siamsak turin a ngen.