Lìrnghing thlena in-rálrin dan tur sawiho

Mizoram State Disaster Management Authority (SDMA) chu Nilaini tlai khan an chairman, chief minister Lal Thanhawla hoin Cabinet Room-ah an
ṭhukhawm a, lìrnghîng nasa tak a thlen thulha inrálrin dan tur an sawiho. Lirnghin laia awm dan tur inzirtirna lehkha in tina sem an rel.

Chief Minister chuan, January 4, 2016 zinga lirnghing khan Mizoram mipui a barakhaih tih sawiin, "Seismic Zone-V a awm Mizoram hian lîrnghîng râpthlak tawng thei reng dinhmuna a din laia tun thlenga kan la tawng lo hi Pathian humhimna a ni. Hetih lai hian, lirnghing nasa tak lo thleng ta se, Aizawl khawpui chêp tak, inhnaih tê têa insakna, khawpui plan mumal nei loa awmte hian eng tin nge kan lo inven theih ang tih leh, sorkar leh mipuiin engtin nge kan lo hmachhawn ang tih ngaihtuah a ṭul tak zet a ni," a ti.

Meeting-a tarlan danin, mithiamte'n an lo zirchian tawh dan chuan, Aizawl khawpuiah magnitude 7 vela nain lîrnghîng ta se, hun rei lote chhungin chenna in tam tak a chhia ang a, second 30 vel lek chhungin mi sing chuang zetin nunna an chán thei dawna chhût a ni.

Meeting chuan, lirnghing thleng ta se, mipuite'n eng nge an tih theih tih inzirtirna uar leh zuala kalpui a ṭul tih an hria a; lirnghing laka him zawkna atana tih leh tih loh tur inzirtirna lehkhaziak Mizoram chhunga in tinah sem an rel.

UD&PA leh Aizawl Municipal Corporation nen thawkhoin, in hlauhawm zualte siamṭhat hna Aizawl Smart City Plan kaltlanga thawh dan zawn ṭha an ti a; building insurance chungchangah sorkar leh mimalin nuai tam tak sênga RCC building ṭha tak tak an sakte chu khuarêl chhiatna thlengin tichhe ta se, hmuh lêt leh tur sum awm loa a ral vek dawn avangin, insurance lamah mipui harh thar a ngaih thu an sawi.

Meeting-ah hian Home minister R Lalzirliana, LAD minister PC Lalthanliana, chief secretary Lalmalsawma, DM&R secretary PC Lallawmsanga te an tel.