MCS, MPS, MIS-a tling tharte chawimawi

ZONET Cable TV chuan Nilaini zan khan Hotel Regency hall-ah Mizoram Civil Service (Combined Competitive) Examinations, 2015-a tlingte chawimawina leh lawmpuina hun an buatsaih a, exam-a tling mi 19 zinga 18 an tel.

Inkhawm hi ZONET Cable TV managing director RK Lianzuala'n kaihruaiin, Dawrpui bialtu pastor Rev. R Lalchangliana'n hunserh a hmang a; ZONET Board director K Sapdanga'n tling tharte hnenah lawmpuina thuziak a hlan a, PL Liandinga'n fuihna thu a sawi.

PL Liandinga chuan, officer atana tling tharte chu fuihin, "Mizoram hi engzata tam nge ka chhuhsak theih dawn ti loin, engzat nge ka pek theih tih ngaihtuah rawh. Nangni'n in pek lohin tuin nge pe chuang ang? Lalpa ka tih theih tâwk chu he ram hi ka pe ve asin i ti ngam a nih ngat chuan i lungawi veng veng ang," a ti.

Officer tharte chu 'sir' leh 'madame' nâla tawlhthlu lo tura chahin, Liandinga chuan, "An sir tak tak dawn che chuan tih tak taka i thawh a ngai, rilru tak taka an zah che a ngai," a ti a; hnuhma tlo leh ngêlnghet hnutchhiah tum tur leh inthunun ṭha turin a fuih.

PL Liandinga chuan, engtikah emaw chuan chung lam aṭangin a dik lo tih chiang taka an hriat ren ti tura nawr luih an la ni mai thei tih sawiin, chutiang hunah chuan chhia leh ṭha hriatna hmang turin a chah a, "Inven dan ngaihtuah ang che. A tàwpkhâwkah phei chuan 'Ka thei lo, ka duh lo' i tih a la ngai ang," a ti.

MCS, MPS leh MIS tharte chu thing-tlanga awm hreh lo tur leh sorkarin awm tura a tihna apianga awm mai turin a chah a, "Mizote'n Mizoram chhungah hmun hla em em kan hre tlat hi a buaithlak a, officer tan Mizoram chhung hla tih tlat hi a tih chi loh. Thingtlanga awm tura sawn in nihin ṭang aih lo ula kan duh. Bul ṭanna a hrehawm pawh loh a tawp lam a nuam ngei ngei ṭhin," a ti bawk.

MPSC-in a buatsaih Mizoram Civil Service (Combined Com-petitive) Examinations, 2015-ah hian Mizoram Civil Service tur mi 10, Mizoram Police Service tur mi panga leh Mizoram Information Service tur mi pali lak an ni.