Thil phût neiin Hnahthial Lunglengah Upa zawkte'n chaw an nghei ve ṭan

Hnahthial South-III Village Council siam thar vanga Lungleng venga chhungkuate ṭhendarh duh lohna lantira Lungleng veng ṭhalai 46-in chaw an nghei chu chhâwk turin nimin khan kum upa zawk mi 28-te chaw ngheina hmunah an inpu lut a; an zingah kum 80 chuang tawh an awm nual.

Tarlan tawh angin, Hnah­thial Lungleng veng ṭhalai mi 46 chuan August 6, 2020 tlai aṭangin chaw an nghei ṭan a, an zingah hmeichhia eng emaw zat an tel. Ṭhalaite chu an chauh tawh avangin nu leh pa, pi leh pute'n chhâwk tumin nimin khan an inpu lut a, an zinga upa ber chu F Lalringa, kum 87 mi a ni.

Lungleng Joint Action Committee (JAC)-in nimina YMA hall - Zofa Rûna inràwn khawm an buatsaihah F Lalringa chuan, ṭhalaite an hahzia leh tawrh nasatzia an hria a, nu leh pate pawh an awm mai mai thei tawh bik lo tih sawiin, "Ṭhalai zawkte chu hringnun hun hman tur la nei zawkah kan ngai che u a, kan khawtlang hruai tur pawhin kan en berte in ni. Keini chu Pathian thu pawhin mihring dam chen tura a bituk pêl tawhte kan ni a, hun kan ngah tawh lo tih kan hria. Chuvangin, ṭhalaite chhâwk zângkhai kan duh a ni," a ti. 

Kum 82 mi H Siamliana chuan, rambuai laia sipaite'n an duh lo chung Lungleng aṭanga Hnahthiala an sâwi khâwm dan leh Hnahthiala an awm tâk zel dan a sawi a; ṭhalaite chhâwk zângkhai tura pên chhuak a nih thu leh, Pathian chakna avangin Lungleng veng thil ngiat chu a hlawhtlin ngei a beisei thu a sawi. Chutih laiin, chaw nghei mek ṭhalaite pawhin, a tàwp thlenga chaw nghei an inhuam thu an sawi bawk. 

Hnahthial aṭanga thu dawn danin, Lungleng ṭhalai chaw nghei mekte hian chaw chhuan kua an ngei tawh a, an zinga mipa pali leh hmeichhia 11 chu an chauh deuh avangin Thawhṭanni zan khan Hnahthial damdawi-inah hruai an ni a, hmeichhia 11-te chu admit niin, mipate erawh chu chaw ngheina hmunah an lêt thung. Hmeichhiate pawh nimin zing khan damdawi-in aṭangin an chhuak a, chaw ngheinaah an kal leh nghal a ni.