Hmarchhak Kristian inzawm khawm NEICC-in Parliament-a BJP MP thusawi an helh Lok Sabha Speaker lehkha an thawn

NEICC Secretary Rev Dr Ram­engliana Ralte-in Lok Sabha Speaker hnena a lehkhathawna a inziah dan chuan, Satya Pal Singh hian Foreign Contribution Regulation Amendment Bill 2020 an ngaihtuah ṭumin Kristiante nêkna leh beihna lam hawi thu hriam tak tak a sawi chhuak a, Kristiante chu FCRA hmanga hel ṭanpui ṭhinah a puh a, heng a thusawite hi media hrang hrangah tihdarh a ni bawk.

Lehkhathawna a lan danin Satya Pal Singh hian, "Meghalaya Education minute kan chhiar chuan Indian hnena zirna kalpui dan tur leh chumi hmanga Kristian-na thehdarh dan tur chiang takin an ziak a ni. India hmarchhaka tun hnai kum 50 chhunga sakhaw pakhat a ṭhan duan bik dan hi kan zavaiin kan hre vek a; sorkar report leh intelligence report-ah pawh FCRA sum hmanga helna a pun chhoh dan pawh a lang a ni," tiin a sawi.

BJP MP hian Lok Sabha-ah hian kum 1999-a Odisha-a Australian Kristian missionary an hal hlum tak Graham Staines chanchin chu mawi lo taka sawiin, "Graham Staines leh a fate pahnih chunga thil thleng kha chu thil dik lo chu a ni ngei a; nimahsela Central Bureau of Investigation, Odisha Crime Branch leh Justice D P Wadhwa Commission-te chhuinaa a lan danin kha hmunah khan tribal-te chu Kristian-ah an inlehtir a, Adivasi hmeichhe naupang 30-te chu hmeichhiat mipatna rawng kaia mawi lo taka khawih an ni a, sakhaw inlehna an kalpui dan pawh a dik lo a, chumi nghawng kal zelah chuan Graham Staines kha thah a ni," tiin Lok Sabha-ah a sawi chhuak niin NEICC chuan lehkhathawnah ziak langin hei hi thai reh turin Lok Sabha Speaker an phût.

NEICC chuan thil awm dan sawifiahin, "India hmarchhak kohhrante FCRA sum hmanga hel ṭanpui ṭhina puhna hi thil dik lo leh phuahchawp a ni a;  kohhran leh Kristian pawl hrang hrangte hi hmarchhakah kum 150 chuang awm tawhin khawtlang nun a ṭha zawnga thlak danglamtu an ni a, zirna leh khawtlang nun siam ṭhatna kawng­ah hna an thawk a, helna nen inkungkaihna an nei lo," an ti.

Graham Staines-a chung­chang sawiin NEICC General Secretary chuan, "Graham Staines-a'n traibal mite tihluihna hmanga Kristian-a inlet tura a nawr anga puhna leh, Adivasi hmeichhe naupang 30-te mipat hmeichhiatna hmanga mawi lo taka a khawih anga puhna hi thil phuahchawp hulhual a ni a, India rama Kristian-te leh Kristian-te sawi chhiatna a ni," a ti a, Kristian mi nuai 35 awmna  NEICC chuan heng thusawite hi a duh loin a do tlat tih a ziak lang a ni.

Rev Dr Ramengliana Ralte Lok Sabha Speaker he thusawi hi record aṭanga thai chhia-a nawt reh turin a ngen a, Kristiante bakah India hmarchhak mipuite en hranna rawngkai a nih theih thu leh, India inpumkhatna thlenga nghawng thei thu ṭha lo tak nia a hriat thu a ziak lang a ni.