Lengte - KMMTTP kawng sial tur Thlawhtheihna aṭangin enfiah a ni

World Bank sum hmanga Mizoram hmar lam aṭanga khawthlang lama Kaladan Multi Modal Transit Transport Project (KMMTTP) kawng sial mek pawh tur chu nimin khan PWD hotute leh consultant LEA Associates South Asia Pvt.Ltd. hotute'n thlawhnain LiDAR technique hmangin aerial survey an nei.

Lengte bul aṭanga KMMTTP kawng pawh tur kawngpui, double lane-a sial tur hi Mizoram PWD leh LEA Associates South Asia-te chuan July 2014 aṭang khan an lo zir chiang tawh a, kum 2014-15
ṭhál chhung khan a hmunah kawng sialna tur an lo sat chhuak tawh a ni.

Kawngpui km. 284-a thui sial tur survey-ah hian leilung awm dan te, mipui leh ramngaw leh nungchate a nghawng theih turte zir chian a ni tawh a; nimina aerial survey-ah hian ngun taka an zir chian bakah, vawiinah an chhunzawm leh ang.

Survey neihna LiDAR khawl hi thlawhnaah vuahin, êng zung a kâp chhuak a, chumi
aṭanga rawn kâp lêt chuan leilung pianzia chiang takin khawlah a hriattir thei a ni. LiDAR an hman avang hian survey dan pangngaia kum hnih chhung vel ngai tur chu ni hnih lek chhungin an zo thei dawn niin an sawi.

Thlawhna aṭanga LiDAR khawl hmanga survey ti tur hian Ministry of Defence aṭangin June 2, 2015 khan phalna hmuh a ni a; kawngpui hian khawthlang lamah Mizoram chhim leh hmâr a thlun zawm dawn bakah, Myanmar leh Bangladesh-te nena insumdawn tawnna atan a
ṭangkai hle dawna ngaih a ni.