Sorkarin Economic Policy thar a duang

MPCC Executive Committee meeting, nimina Congress Bhavan-a neih chuan resolution pass in, Mizoram sorkarin Economic Policy thar duang chhuah ta tih an tarlang a, lawmawm an tih thu an sawi.

MPCC meeting chuan, "CM Lal Than-hawla kaihhruaina hnuaia Mizoram sorkarin Economic Policy thar a duang hi Mizo mipui tan thil lawmawm tak a ni a. Ei ve hram hram dinhmun aṭanga hralh chhuaktu dinhmuna Mizoram kan inhlankaina tur Economic Policy thar duan chhuah a ni hi ṭha kan tiin lawmawm kan ti tak zet a ni," an ti.

Congress party chuan, Mizoram sorkarin sum leh pai dinhmun a ṭhat theihna tura hma a laknate chu lawmawm an tih thu sawiin, "K-Deposit-a sum cheng vbc. sang chuang awm ṭhin titlem chho a, tuna cheng vbc. 700 emaw vela a tlahniam ta hi lawmawm kan ti hle," an ti a; kum 2015-a rel kawng siam ṭhat a nih vanga mega block awm chung leh fûr ruahtui tlak nasat laia ei leh bâra harsatna a thleng lo chu lawmawm an tih thu an sawi.

Kum 2015 Krismas leh 2016 kumthar vuakvet chhungin Mizoram pumah harsatna lian tham a thleng lo nia sawiin, MPCC chuan, "MLPC Act kan hman ṭan kum a ni chunga khawlaia zu vanga buaina awm loa law & order ṭha taka kenkawh a ni hi lawmawm kan ti," an ti. Sorkar tluang taka a kal theihna tura ṭawngṭaipui turin mi tin an sáwm.

MPCC meeting hi pre-sident leh chief minister Lal Thanhawla'n a kaihruai a; kum 2015 chhunga sorkar hmalak-nate an thlirlet bakah, infuih tharna hun an hmang a ni.