Hmasawnna a kal chak lo: MPC President

Mizoram People Conference (MPF) chuan nimin khan kum 2016 atan an party pisa an hawng a; an president Lalhmangaiha Sailo chuan, Mizoramah hmasawnna a kal chak thei lo nia sawiin, "Hmasawnna kal chak thei lo state nih hi a zahthlak," a ti.

MPC party pisa hawn-na inkhawm hi execu-tive vice president Dr Kenneth Chawngliana'n a kaihruai a; Lalhmangaiha Sailo chuan, kum 2018 inthlan lo awm tur tinzâwnin MPC chuan theihtawpin hma an la dawn tih a sawi.

Lalhmangaiha Sailo chuan, MPC chu Mizoram hmasawnna tak tak atana policy leh programme nei ṭha ber a nia sawiin, "Mizoram hmasawnna chak taka thlentir tur chuan MPC hian Mizoram rorelna fung kan chelh ngei a ngai tawh a ni," a ti.

Mizoramin remchanna hrang hrang a nei chungin hmasawnnna a kal chak lo hle nia sawiin, Lalhmangaiha chuan, "India ram state tênau 10 zingah hmasawnna lamah ṭhang chak lo ber kan a ni," a ti a; hmasawnna a kal chak theih loh chhan chu Mizoram hmasawnna atana policy leh programme mumal nei loa state sorkar kum 30 kalpui vang a nih thu a sawi.

MPC President chuan, Mizoram hmasawnna chak lo lutuk rah chu miretheite'n an tuar nasa ber tih sawiin, "India ram state-te hi a enkawltu azirin hmasawnna lamah an kal chakin, an kal chak lo mai a ni. State dangte ûm pha loa kal reng mai hi a zahthlak hle," a ti.