HSSLC Exam 2020 result dik lo vangin MBSE-a thawk mi pali 'black list' an ni
Mizoram Board of School Education (MBSE) chuan, HSSLC Examinations 2020 result chhuaka dik lo eng emaw zat a awm avangin result khawihtu zinga mi pali chu exam leh a kaihhnawih reng reng khawih tawh lo turin black list-ah a dah. MBSE chairman F Lianhmingthanga chuan, an hmalakna chu School Education Minister Lalchhandama Ralte-in action lak a nih tur thu a lo sawi tawh anga tih a nih thu a sawi.
Vanglaini palaiin a kawmnaah MBSE chairman F Lianhmingthanga chuan, exam leh a kaihnawih khawih tawh lo tura an tihte chu examiner pahnih, scrutinizer leh tabulator pakhat ve ve an nih thu a sawi a; mi palite chu an hming leh nihna RTI Act Section 8(1)(g) tlawhchhana pho chhuah chu Supreme Court ruling awm sa avangin phal a ni lo tih a sawi thung.