District thar pahnihah MPF District Forum hawn a ni

Mizoram People's For­um (MPF) president Rev. R Lalchang­liana chuan August 10, Thawhṭanni zan khan MPF, Khawzawl District Forum a hawng a, nimin khan Saitual District For­um a hawng bawk.

MPF Khawzawl Dis­trict Forum hawnna in­khawm hi Khawzawl Veng­­thar Presbyterian Koh­­hran hall-ah neih a ni a, dis­trict forum hruaitu tharte leh Tuichang Constituency ­Forum hruaitute hming puan nghal a ni. MPF President chuan nimin khan Sai­tual Presbyterian Kohhran Centenary Hall-ah MPF Saitual District Forum a hawng a, hruaitu tur thlanna an buatsaih nghal.

District headquarters pahniha MPF forum hawnnaah hian MPF ge­ne­ral secretary Rev. R Lalnuntluanga leh Aizawla hruaitu dangte an tel an ni. MPF president Rev. R Lalchangliana chuan, MPF-a tel kohhran hrang hrang leh pawl dang hruai­tute an thawkho ṭha hle tih sawiin, sorkar nen pawh an thawhho ṭhat thu a sawi a; Khawzawl leh Saitual district-a MPF forum hrang hrangte chu ṭha taka thawkho zel tur leh, inthlanna dik leh thianghlim a awm theih nan ṭan la zel turin a chah.

Rev. R Lalchangliana chuan, MPF chu Mizoram politics siamṭhatu a nih thu sawiin, "Political party-te pawhin an zah em em a, kan ram politics pawh a thianghlim sawt. Politics-ah ngaihdan dik min siamsak a, MPF hi kan ramin malsawmna a dawnna pawh a ni," a ti.