Mizorama sample endik zinga 2.63%-in Covid-19 an vei

Covid-19 vei leh vei loh hriat nan Mizoram aṭangin August 10 thleng khan swab sample 23,853 endik a ni tawh a, niminah mi eng emaw zat endik leh a ni. Hripui vei mi 628 hmuh chhuah a ni tawh a, endik zat 23,853 aṭangin 2.63% a ni.

Mizoram aṭanga swab sample endikna hmasa ber National Institute of Cholera and Enteric Diseases (NICED), Kolkata-ah mi panga endik a nih hnuah Guwahati Medical College-ah mi 12 endik a ni a; Mizorama thlawhtheihna thlawk tihtawp a nih avangin Silchar Medical College-ah endik turin swab sample thawn ṭhin zui niin, mi 41 endik a ni.

April 7, 2020 aṭanga Zoram Medical College (ZMC) laboratory-a swab sample endik ṭan a nih aṭangin mi 21,000 endik a ni tawh a, Lunglei Civil Hospital (LCH) laboratory-ah Truenat-PCR hmangin mi 1,294 leh Rapid Antigen Test hmangin district hrang hrangah mi 1,501 endik a ni tawh bawk.

NICED-a endik zingah Covid-19 vei an awm lo a, Guwahati Medical College-ah Mizorama hripui vei hmasa ber chu March 24-ah hmuh chhuah a ni a, Silchar Medical College-ah Covid-19 positive hmuh chhuah an ni lo. Nimin tlai thleng khan ZMC-ah 501 hmuh chhuah tawh a ni a, LCH-ah mi 51 leh Rapid Antigen Test hmangin mi 75 hmuh chhuah tawh a ni. Hetih lai hian, screening point hrang hrangah mi 1,51,232 enfiah (screen) a ni tawh bawk.