Mizoram sorkarin GSDP aṭanga chhutin a target aia sang zawk leiba a nei

Mizoram sorkarin growth state domestic product (GSDP) aṭanga chhuta leiba a neih zat (debt-GSDP ratio) chu a target siam aiin a sang zawk.

Assembly Session hnuhnung bera tlangzarh tak State Finances Audit Report of the Comptroller and Auditor General of India (CAG) for the ended March 31, 2022 a tarlan a nih danin, kum 2021-2022 khan Mizoram debt-GSDP ratio chu 42.61% a ni.

Hetihlai hian Mizoram Fiscal Responsibility and Budget Management (MZFRBM) Act, October 2020 a amend-ah chuan debt-GSDP ratio target chu 27.63% a ni.

Comptroller and Auditor General of India (CAG) chuan MZFRBM-a target siam chu Mizoram sorkarin zawm ngei se a duhthu an report-ah hian an tarlang.

Tunhnai kum 5 chhung (2017-18 to 2021-22) chhungin kan GSDP-a agriculture sector leh industry sector-in a thawhve percentage a tlahniam hle a, agriculture sector hian kum 2017-18 ah 13.38% a thawh laiin, kum 2021-22 ah chuan 7.48% chiah a thawh tawh.

Industry sector chuan kum 2017-18 ah kan GSDP-ah 17.03% a thawh a, kum 2021-22 ah chuan 12.17% ah a tlahniam. Kan GSDP-a thawh hlawk ber chu service sector niin, 43.91% an thawh a ni.

Mizoram sorkar chuan March 31, 2022 thleng khan leiba (public debt) cheng vbc. 5,773 a nei a, chung zingah cheng vbc. 3,889 (67.37) chu kum 10 chhunga rulh tur a ni a, a bak cheng vbc. 1,884.26 (32.63%) chu kum 10 hnulama rulh tur a ni.

Public debt. a pung (interest) kum 10 chhung rulh tura chhut chu cheng vbc. 2,755.87 niin, kum 10 hnulam (2031-32 thleng) a rulh tur chu cheng vbc. 2,301.42 a ni.

Mizoram sorkar chuan a leibat cheng vbc. 3,797.95 (83.28%) chu a hma-a leiba a lo neih tawh rulhna atan a hmang a, a bak 762.33 (17.72%) chu thil dang atana hman a ni.

CAG chuan Mizoram sorkarin chhiah (state own tax revenue) leh chhiah ni chiah lo aṭanga sum hmuh (state own non tax revenue) aṭanga sum tam zawk a hmuh theihna atan hma a lak a ngai hleah a ngai.