Education Minister-in hun vawng dik tur leh sikula awm ṭha turin zirtirtute a chah

Thingsat Primary School chuan nimin khan an sikul kawt zawlah kum 60 an tlinna, Diamond Jubilee an lawm a, School Education minister Lalchhandama Ralte-in hmanpuiin; zirtirtute chu hun vawng dik leh sikula awm ṭha an nih a pawimawh thu a sawi.

Lalchhandama Ralte chuan, khawtlang hruaitute leh zirtirtute chu hmasawnna leh khawtlang ṭhan nan zirna chu a kipui a ni tih hre thar leh turin a chah a, "Zirtirtute hi zirna sikul neitu thinlung pu an nih a ngai a, hun vawng dik leh sikula awm ṭha an nih a pawimawh avangin tunhnaia zirtirtu lakah a theih chin chinah a khaw mite lak tum zel an ni," a ti.

Zirna-in leh compound chu khawtlang rohlu a nih avangin humhalh a pawimawh thu Education Minister chuan, "Hmar tlangdung tihhmasawn nan sorkarin higher secondary school - arts, science leh commerce zirnate a hawng thar a, hriselna lamah Tuivawl bial khaw tin ten health worker an nei kim a, clinic centre an nei kim," a ti a, inkalpawhna lamah Seling - Manipur leh Bhaga road-te siam tura ruahman fel a nih tawh thu a sawi.

Education Minister hian diamond jubilee lungphun a hawn bakah, zirtirtu leh zirlai hlawhtlingte hnenah chawimawina a hlan.

Thingsat Primary School hi kum 1963-ah din a ni a, zirtirtu pakua leh zirlai 40 an awm mek a ni.