Faina beihpui thlakna tur hawng

Deputy chief minister Tawnluia chuan nimin khan Mizoram Rural Bank auditorium-ah Swachhata Hi Seva (Cleanliness is Service) a hawng a, October 2, 2023 thleng kalpui tur a ni. Kumin faina hapta thupui chu Garbage Free India (Bawlhhlawh awm lo India) tih a ni.

Tawnluia chuan, faina leh thianghlimna chu inngheng reng an nih thu a sawi a, "Khawtlangin bawlhhlawh paih leh sawngbawlna kawngah kan ṭanrual a pawimawh hle a, mipui rilrua faina leh thianghlimna pawimawhzia bakah naupangte rilruah pawh tuh ngheh a nih theih nan awareness campaign kalpui uar lehzual a ṭul," a ti a; tunhnaiah Assembly Session-ah The Mizoram Protection of Rivers a siam chu lawmawm a tih thu a sawi.

Hawnna inkhawm hi UDPA secretary Lalmalsawma Pachuau-in a kaihruai a; PHE secretary C Lalremsiama, UDPA director Dr Andrew H Vanlaldika, AMC joint commissioner Lalremruata Kullai leh Romalsawma, Mission Vengtlang-te'n thu an sawi bakah, Zarzokimi kaihhruaiin kalkhawmte'n faina lama thutiam an sawirual a ni.

He hunah hian Swachhata Hi Seva Indian Swachhata League 2.0 volunteers leh safaimitras (thianfaitute) hnenah chawimawina hlan a ni a; Hrangbana College, Aizawl College, Johnson College, Mission Veng Youth Adventure Club, Pachhungah University College leh Zirtiri Residential Science College naupangte'n September 15 & 16, 2023-a cleanliness drive an neih lawmpui nan pawisa leh chawimawina certificate hlan an ni bawk.

AMC joint commissioner Lalremruata Kullai tarlan danin, Aizawl khawpuiah AMC chuan bawlhhlawh khawn khawm nan lirthei 151 a hmang a, Aizawl khawpui chu daipawna inthiar awm miah lohna (ODF plus) ni turin hmalak mek a ni. July 2023 aṭang khan AMC Ward 19-ah in tin (door- to-door) a bawlhhlawh khawn khawm enchhinna kalpui mek a ni.