Huaisen lawmman hlan

India rama civil mite tana huaisenna chawimawina sang ber, hun leh hmun harsa tak kara mahni nunna thapa midang nunna chhanchhuaktute hnena hlan ṭhin, Sarvottam Jeevan Raksha Padak Award chu nimin khan Imanuel Lalawmpuia (L) s/o Ronald Lalchhuanawma chhungte hnenah Saitual DC Dr Lalngura Tlau-in a hlan.

Mualpheng YMA president C Lalthlamuana tarlan danin, Imanuel Lalawmpuia leh a ṭhiante hi April 2, 2022 khan Aizawl Zoological Park ena an kal hawlam, Tlawnglui Sihhmui kaiah inchiahdai leh tura an kalnaah a ṭhianpa Larry Lawmnakima chu tuiah tlain a talbuai a, a ṭhianpa chhan tur hian rang takin tui a hleuh nghal a, theihtawpa chhan tuma a beih avangin a ṭhianpa chu vaukam lamah a inhai chhuak thei a ni.

Immanuel Lalawmpuia erawh tui khauh in a la zui ta a ni. Nunna a chan lai hian Immanuel Lalawmpuia hi BA 6th semester zirlai a ni.

Dr Lalngura Tlau chuan, Saitual district-a India rama civil mi, mi huaisente tana chawimawina sang ber dawng thei an awm chu ropui a tih thu a sawi a, "India ramah huaisen chawimawina hi chi thum a awm a, chung zinga sang ber chu midang tana nunna hlante chawimawina, Sarvottam Jeevan Raksha Padak Award hi a ni," a ti a; Imanuel Lalawmpuia'n huaisen chawimawina a dawn theih nana khawtlang hruaitute hmalakna fakawm a tih thu a sawi bawk.

Sarvottam Jeevan Raksha Padak Award hian medal, citation leh Rs 2,00,000 a keng tel a ni.