KHAWTHLIR

Zohnahthlakte  tanpuina tur

Nimin khan Central YMA chuan Manipur buaina avanga Zohnahthlakte ṭanpuina tur Dawrpui Branch MUP hnen aṭangin Rs. 10,000, Lushai Trading aṭangin Rs. 1,00,000 leh Lenrual hlui (PUC Sc. Ex- Student) hnen aṭangin Rs. 54,000, a vaiin Rs. 1,64,000 an dawng. CYMA president R Lalngheta chuan ṭanpuina petute chungah lawmthu sawiin, "Mizo nih a nawmzia leh Mizoten kan unau kan Zohnahthlakpuite kan hmangaihzia kan lantirna hi a ropui," a ti.

Jubilee lawm

Sakawrdai Middle School chuan nimin khan an sikul tualzawlah kum 50 (golden jubilee) an tlin lawmna an hmang a, School Education minister Lalchhandama Ralte-in a hmanpui a, jubilee pual lungphun a hawn bakah, souvenir a tlangzarh nghal. Sakawrdai Middle School hi kum 1973-ah din a ni.

District lungphun

Khawzawl district bawrhsap K Lalrohlua kaihhruaiin nimin khan DC conference hall-ah sorkar hotute leh tlawmngaipawl hruaitute'n Khawzawl DC Office building thar leh a kawta Khawzawl District Lungphun hawn dan tur an sawiho a; October 2, 2023-ah hawnna inkhawm neih ni se, an ti. Deputy chief minister Tawnluia, bialtu MLA chu hawng tura beisei a ni.

Public park siam sawiho

Siaha District Level Special Task Force for Awareness Campaign on Solid Waste Management chu an chairman Lalhmunsanga Hnamte, bawrhsap kaihhruaiin nimin khan DC conference hall-ah an ṭhukhawm a; faina kawnga hmalakna tur hrang hrang an rel bakah, Siaha khawpuiah 'public park' a awm theih nan Rashtriya Gram Swaraj Abhiyan Scheme hnuaiah 'public park' siamna tur dil ni se, an ti.