MNYF-in two wheeler rally an buatsaih; Martarte i hlut ang u - MNF Sr. VP

Mizo National Youth Front (MNYF) chuan nimin khan Aizawlah Martarte Ni pualin two wheeler rally an nei a, a kharna inkhawm Vanapa Hall kawta buatsaih hmanpuitu MNF sr. vice president Tawnluia, dy. CM chuan martarte hlut turin ṭhalaite a sawm.

Tawnluia chuan hnam martarte chu Mizo hnamin zalenna kan neiha, awpbehna aṭanga zalenna kan hmuh theihna atana beitu an nih thu sawiin, "I tân leh ka tâna an nunna hlu tak hlantute kha an ni. Ṭhalaite hian i hlutin i chawimawi ang u. Kan hnam martar-te'n kan ram leh hnam an hmangaih avànga mahni inphatsana, an nunna hlu tak an hlàn ang hian ram leh hnam chhan turin ṭhalaite'n kan rilru i sawh nghet deuh deuh ang u," a ti.

MNF Sr. Vice President chuan kan hnam pasalṭhate khan 'kan ram leh hnam tân kan thawh theih tawkte thawk zoin ṭhangtharte chhunzawm atân kan hlàn ta e,' an tih thu sawiin, "Keini ṭhangtharte hian engtin nge kan chhan dawn le? Kawng hnih khat talin Mizoram tân i inhlan thar leh ang u," tiin kalkhawmte a sâwm.

Martarte chu kan hnam tâna meichher kengtute an nih thu sawiin Tawnluia chuan, "Kan ram leh hnam tâna ke kan penna kawngah kawng kan zawh sual dawn pawhin an meichher eng ken kha hre rengin ram leh hnam tân chakna thar kan neih theih nân i hmang ṭhin ang u. Hnam martarte hian kan hnam an ti zahawm a, ṭhalaiteah inpumpekna leh lungrualna thlen zel se ka duh," a ti.

Tawnluia chuan remna chungchang sawiin, "Mi ṭhenkhatte'n MNF chu an in-surrender, zalenna an sual peih tawh lo, tiin an sawi ṭhin. Thu dik tak chu hei hi a ni MNF hi an in-surrender lo a, Zorama pawl hrang hrang leh party hrang hrangte, kohhran hrang hrangte'n remna a awm theihna atân theihtawp chhuahin hma an la a, remna a awm theihna atân tiin kawngte zawh a ni. Hetianga kawng hrang hranga hma lak a nih takah chuan Zoram mipuite duh dan angin remna chu siam a ni ta a ni," a ti.

MNYF buatsaih two wheeler rally-a telte hi AMC building, Ṭhuampui aṭanga tlan chhuakin, Vanapa Hall kawtah a kharna hun an hmang a ni.