Tute emaw sum siamna atana ren lo takin sorkar sum kan hmangve dawn lo - K Sapdanga

ZPM chuan September 18, Thawhṭanni zan khan Saipumah vantlang inkhawm an buatsaih a, thusawitu ZPM working president K Sapdanga chuan ZPM sorkar hunah chuan tute emaw sum siamna atan sorkar sum ren lo takin an hman ve dawn loh thu a sawi.

ZPM Working President chuan ZPM sorkar hunah chuan MLA-ten car thar leina tura sum tam tak senga sorkar thar a nih veleh an lei nghal ngawt ang hi an tive dawn lo tih sawiin, "Inren chungin ram tan hna kan thawk dawn. Tute emaw sum siamna atana sorkar sum ren lo taka hman ang chi hi kan ti ve ngai dawn lo a ni," a ti.

Sorkar kalphung hlui hi vuiliam an chak ngawih ngawih tih sawiin K Sapdanga chuan, "Dik lo leh fel lo huaisen taka hnawl ngam turin i ṭangrual ang u. He bialah hian MLA kan thlang dawn a ni satliah lo, sorkar thar kan tuak dawn a ni," a ti a, vote kan thlak hian chief minister tur kan vote tel tih hre turin mipuite a sawm.

Kan thlawhhma kawngte, kan khaw kar kawngte hi an vote tel tih mipuiin hria se a duhthu sawiin ZPM Working President chuan, "He inthlan lo awm turah hian leiba min siam belh thur thur tur nge kan vote zel dawn a, inrenchem taka ram kaihhruai tumte tih ngaihtuah ang u. Kalphung thar mipui sorkar tuakchhuah puiah ka sawm che u a ni," a ti.

UT kan nih aṭanga kum 50 a liam hnuah pawh kan thawhrimna hian awmzia a la nei hlei thei lo tih sawiin K Sapdanga chuan, "State dangte hmasawn ruala hmasawn hlei thei loin kan awm mek. Kan sorkarin ching rawh u tia min zawrh apiang kan hlawhchham pui zel. beidawn tawpah mau ching turin kan inti ta vel mai mai a, a beidawnthlak hle," a ti.

K Sapdanga chuan kut hnathawktute tan hian ZPM sorkar chuan ruahmanna lianpui pui a siam tih sawiin, "Thlai thar lei tur thlai chi li a thlang fel a, budget session hmasa berah kut hnathawktute pual budget kan dah dawn," a ti a, budget-a sum dah hmangin thlai thar an lei dawn thu a sawi.

Serlui biala ZPM candidate C Lalthanfela pawhin thu sawiin, "He ram siamṭha tur hian kei hi a tling ber leh ṭha ber ka ni hauh lo a, ka hmabaka tih tur awm erawh tihhlawhtlin ve tum tlat mi ka ni. He bial mipui tan hian thil ropui tak tiam lawk thei lo che mah ila, dikna leh rinawmna nen he bial tana chhen fakawm nih theih hi ka inbeisei tlat," a ti.

ZPM thuchhuah tarlan danin, ZPM Working President hian an party-ah mi 44 a lawmlut.