Online hmanga chhiah pekna hawng

Land Revenue & Settlement minister Lalruatkima chuan nimin khan Assembly Annexe conference hall-ah internet kaltlanga chhiah pekna 'online tax & zoram chhiah payment' a tlangzarh a; Survey of Villages Abadi and Mapping with Improvised Technology in Village Areas (SVAMITVA) Scheme hnuaiah property card a sem nghal.

Lalruatkima chuan, internet kaltlanga chhiah pekna a hlawhtlinna tura theihtawp chhuahtute chungah lawmthu a sawi a, "Chhiah pek hi khua leh tui ten kan tih tur, kan mawhphurhna a ni tih kan hriat a pawimawh a, a hun taka chhiah pek hi kan tum a pawimawh a, kan inzirtir pawh a ṭul hle, " a ti a, internet kaltlanga chhiah pekna chu mipuiten awlsam zawka chhiah an pek theihna tur a nih thu a sawi.

National Generic Document Registration System kalpui mekah Sub- Registrars’ Office (SRO) pawh Khawzawl, Hnahthial leh Saitual tih loh district dang zawngah hawn a nih tawh thu sawiin Minister chuan, "Document hrang hrang kan neih te, thurochhiah thlengin SRO hnenah kan ziah luh a pawimawh a, court-ah thubuai hlabuai a awm pawhin heng document SRO hnena register tawhte hi chu sorkar document a nih tawh avangin thiam chan a awlsam zawk tawh a, kan register loh chuan harsatna kan tawk thui thei zawk a ni," a ti.

Internet kaltlanga chhiah pekna (online revenue payment system) hnuaiah hian land tax leh Zoram chhiah pekna module hran ve ve awmin, online portal 'landtax.mizoram.gov.in' kaltlangin chhiah a pek theih tawh dawn a, a bulṭan nan Aizawl Municipal Corporation (AMC) huam chhung atan hman phawt a ni ang. A hlawhtlin dan azirin Mizoram pum tuam chhuah tum a ni. CSC hrang hrang kaltlangin chhiah hi a pek theih bawk a, a pawisaa pe duh tan Revenue office-ah kalin a pek theih bawk.

SVAMITVA Scheme hi sorkar laipuia Ministry of Panchayati Raj hnuaia Central Sector Scheme a ni a, he scheme hnuaiah hian drone hmangin thingtlang khuaa mihring chenna hmunte thlalak a ni. Thlalak hmang hian Property Card siam sak ṭheuh an ni a ni a, hei hian ramri chungchanga buaina a tihtlem bakah khaw hmunhma ruahman (town & village planning) leh loan lak kawngah te awlsamna a thlen beisei a ni.

Tun dinhmunah Mizorama khua 319-ah SVAMITVA Scheme hi kalpui tura ruahman a ni a, khua 171-ah drone hmanga thlalak ṭan tawh niin, hmarchhak state zingah Phulpui (card 166) leh Tachhip (card 254) chu Property Card semchhuahna hmasa ber an ni.

Nimin khan khaw pasarih – Ṭhiak (card 161), Sumsuih (card 158), Hmuifang (card 63), Lamchhip (card 113), Chamring (card 56), Sailam (card 164) leh Lungsei (card 48) khua mite hnehah Property Card 763 sem a ni.