SEDP sem dan tur sawiho a ni

Champhai District Level Socio Economic Development Programme (SEDP) Committee chu an chairman James Lalrinchhana, bawrhsap kaihhruaiin September 18, Thawhṭanni khan DC conference hall-ah an ṭhukhawm a, SEDP thawh hnihna sem dan tur an sawiho.

Ṭhutkhawmah hian SEDP line department pariat – UDPA, Agriculture, AH&Vety, Horticulture, Sericulture, Fisheries, Commerce & Industries leh Land Resources, Soil & Water Conservation department hotute bakah member dangte an tel a; line department-te chuan SEDP thawh khatna an sem fel tawh thu endikna report pawh DC pisaah an thehluh tawh thu an sawi.

SEDP thawh hnihnaah hian line department pariat hnuaiah ṭanpuina dawng tur chhungkaw 4,519 an awm a; line department hotute chuan a ṭul ang form-ahte ṭanpuina dawng tur signature an lak tawh thu leh; pawisa pawh an dawn tawh thu an tarlang a ni.

Ṭhukhawm chuan SEDP thawh hnihna chu September 20, 2023-ah hawn ni se, an ti.