Kumin kumtawpa MLA inthlan lo awm tura Tuikum biala independent-a din tum C Lalrinmawii, Chhiahtlang chuan nimin khan Aizawl Press Club-ah press conference neiin, independent-a MLA candidate nih a tum chhan a sawifiah.
C Lalrinmawii chuan August 2021 khan independent-in Chhiahtlang South aṭangin VC atana thlan tlin a nih thu sawiin, "Theihtawp chhuahin hma ka han la ve a mah se, VC thil tih theihna hi a lo tlemin, khawtlang nu leh pa chan chang si hian mi harsa, miretheite dawmkang turin VC-te hian thiltih theihna hi kan lo nei tlem khawp mai. Khawtlang tana theihtawp chhuah ka tum venate chu duh angin hma lak a harsa em em a, VC-te ai hian party/unit-te hian thuneihna an lo nei sang zawk hle a lo a ni," a ti.
Mi harsa zawkte ṭanpui ngai ṭanpui leh dawmkan an ngaihna laia khawtlang tana a awm thei lo chu a rilru a nat thu sawiin C Lalrinmawii chuan, "Pathian hnenah ka ṭawngṭaia, zan khat phei chu ka muhil thei lo hial a ni. Kan khawtlang hi dawmkanga, hmangaih taka chawikan ka tum eng emaw chen theih mah se, party/unit induhsakna ringawt chuan kan khawtlang leh mipui hian hma an sawn thei dawnin ka hre lo," a ti a, unit chung, MLA-a a awm ngaia a hriat tak thu a sawi.
C Lalrinmawii chuan MLA atana thlan tlin a nih chuan Tuikum bial chhunga khaw 20 enkawl a ngaih dawn thu sawiin, 'An mamawh, an harsatna sukiang a, mi harsa zawkte dawmkang thei tur hian mipui MLA chuan thlei bik leh duhsak bik nei loin, hmangaihna nen kan ram, kan bial chhung mipuite harsatna, retheihnate ka hmuhpuiin ka hriatchian pui em em a ni. Neutral taka han thlir hian kei aia bial mipuiten harsatna an thlen ngamna leh dawmkang theitu tur awmin ka hre lo," a ti.
C Lalrinmawii chuan Tuikum bial mipuiten party unit leh party MLA-ten an bial chhunga an hmalak dan leh an sulhnu an hre ṭheuh tawh tih sawiin, "Kan lungawi lohnate hi sawi sawi tawh lo hian kan rilru ṭheuh siam ang u. Kan bial chhung harsatna sukiang a, dawmkang tur hian nang leh kei hi kan pawimawh," a ti a, dikna, rinawmna nen MLA inthlan turah amah vote turin an bial mipuite a sawm.