Mirethei insak ṭanpuina pe chhuak

Land Revenue & Settlement department chuan nimin khan Mizoram sorkarin thing-tlang khuaa mirethei insak ṭanpuina (PMAY-G) pawisa cheng nuai 6,066.25 a pe chhuak tih a tarlang.

LRS department chuan, insak ṭanpuina hi a tahtawlin ṭanpuina dawng turte bank account-ah thun mek a nih thu a tarlang a, "Chief Minister leh Rural Development Minister hmalaknain Mizoram sorkarin a pe chhuak leh ta. He insak ṭanpuina pawisa hi Mizoram puma PMAY-G beneficiary chhungkaw sing chuang, insak ṭanpuina dawng mek leh first instalment dawn hmabakte hnenah direct benefit transfer (DBT) hmangin an bank account-ah a tahtawlin thunsak mek a ni," a ti.

Governor Dr Hari Babu Kambhampati chuan March 13, 2023-a Raj Bhavan-a Rural Development department hotute a kawmnaah, Prime Minister-in PMAY-G a ngai pawimawh tih sawiin, "He hmalakna hnuaiah hian kum 2022 a ral hmain chenna in la nei lote'n chenna in an nei vek tura ngaih a nih laiin, kum 2024 thleng hmalakna hi pawhsei a ni," a ti a, hun pawhsei leh tâk chhung ngei hian hna thawk zo thei turin RD department-in theih tawp a chhuah a, a ṭan lehzual a ngaih thu a tarlang.