Cheng nuai 3 thleng SEDP pek tum a ni - Minister K Lalrinliana

Kolasib district-a Bairabi, Meidum, Pangbalkawn leh South Chhimluang khuaah nimin khan Family Oriented Socio-Economic Development Programme (SEDP) thawh hnihna hnuaia ṭanpuina dawng turte tan thil pawimawh inhrilhfiahna, 'Beneficiary Assembly & Re-orientation' buatsaih a ni a; minister K Lalrinliana, bialtu MLA-in a hmanpui a, SEDP cheng nuai 3 thleng pek tum a nih thu a sawi.

K Lalrinliana chuan, Mizoram ei leh bar leh sum leh pai dinhmun (economy)-in hma a sawn a, mipui an intodelh theih nan leh ei zawnna ngelnghet nei lote'n eizawnna ngelghet an lo neih theih nan SEDP chu sorkarin a ruahman tih a sawi a; "SEDP thawh thumna (Phase 3) pawh a tahtawla chhunzawm zel tura ruahman a ni a, Governing Board leh Executive Board-te'n an pawm tawh. Ṭanpuina hi la sem chhunzawm zel tur niin, Rs 3,00,000 thleng pek tum a ni," a ti.

SEDP chu hlawhtlinpui theih a ni tih hriaa theihtawp chhuah tura ṭanpuina dawngtute chahin Minister chuan, " Tu leh fate tan pawha chhenfakawm leh chhunzawm zel tlakin hma la ang che u. Trade thlanah fimkhur a ngai a, ran vulh leh hmalakna dangah insurance tih nachang hriat a pawimawh," a ti a; mahni zawh tawka bulṭan a, hma zauh zel turin a fuih.

Minister chuan ram leh hnam zahawm ni turin intodelh a ṭul tih a sawi a, "Intodelh turin mamawh tihtlem te, inrenchem leh sum khawlte a pawimawh a, sorkar aṭanga ṭanpuina dawn theih ang apiang dawn a, hmasawn nana hman si loh chu thil zahthlak tak a ni. Intodelhpui a, hausakpui tum ang che u," a ti.

Kolasib district-ah hian line department pariat hnuaiah SEDP thawh hnihna dawng tur chhungkaw 4,438 an awm a; tunkar chhung hian an bank account-ah ṭanpuina first instalment Rs 25,000 lutfel hman tura beisei a ni.