ZMC-ah private cabin hawn a ni

Health & Family Welfare minister Dr R Lalthangliana chuan nimin khan State Referral Hospital - Zoram Medical College, Falkawnah private cabin block sak thar a hawng.

Cabin hi CSS leh Special Central Assistance sum cheng nuai 1153.35 senga sak a ni a; project hian a chhung cheina tura mamawh hrang hrang leina tur sum a ken tel loh avangin mi inphal mi pariatte sum thawhkhawm cheng nuai 54 sengin thawh a ni.

Dr R Lalthangliana chuan cabin cheibawlna tura sum thawhtute hnenah donor card a hlan a; thu sawiin, "Damlo enkawl hna hi hna pawimawh leh ropui tak, ngaihthah chi loh a ni a, hmangaihna, lainatna leh duhsakna nen damlote enkawl a pawimawh," a ti .

Mizoram chu state dangte nen khaikhinin IMR dinhmun a ṭhat thu te, NITI Aayog health index-ah India ram state te (small states) zingah kum 2017 aṭangin pakhatna a la nih ziah thute Health Minister chuan a sawi a, "Hriselna kawngah hmasawnna tur hmabak tam tak la nei mah ila, theihtawp chhuaha kan ṭan tlan chuan rah ṭha tak kan la hmu thuai ang," a ti bawk.

Khualzahawm Prof. F Lalnunmawia, MLA pawhin thu a sawi a; hawnna inkhawm hi HFW principal secretary Esther Lal Ruatkimi'n a kaihruai. Aizawl DC Nazuk Kumar, ZMC director Dr John Zohmingliana, PWD EE H Lalnghinglova leh ZMC director hlui Prof. L Fimate te'n thu an sawi bawk a ni.