KHAWTHLIR

Aizawl district magistrate R Lalramnghaka, District Task Force on Covid-19 chairman ni bawk chuan, August 10, Thawhṭanni zan khan Dawrpui Vengthar leh Mission Vengthlang huam ­chhunga total lockdown puanna thupek a chhuah. DC-in total lockdown a puan chhan hi Covid-19 laka khaw­tlang mipui an him zawk nan leh mipui mimira inkai darh a nih loh nan a ni. Magistrate-in total lockdown a puan hma hian veng pahniha local task force-te chuan total lockdown an lo puang tawh a ni.

Lawngtlai District Legal Services Autho­rity chuan nimin khan DC conference hall-ah The Mizoram Victims of Crime Compensation Scheme, 2011 aṭangin pawi khawihna tuartute zangnadawmna an sem a, bawrhsap Dr Andrew H Vanlaldika'n a hmanpui. Zangnadawmna dawngtu hi mi paruk an ni a, an vaia an dawn belhkhawm chu Rs. 26,50,000 a ni.

Mizoram Rural Bank (MRB), Farkawn Branch chu nimin khan MRB chairman V Jayachandar-in a hawng a, branch hawn thar chuan Farkawn khaw chhung leh a hnaivaia sorkar hnathawk, private institution-a thawk, lo neih & ran vulha eizawng, dawr neitute etc. tam tak tan awlsamna a thlen ngei a beisei thu a sawi. Nimina hawn tak nen hian MRB hian branch 87 a nei a ni.

Ministry of External Affairs hnuaia The Research and Information System (RIS) for Deve­loping Countries, North East Training, Research and Advocacy (NETRA) Foundation, Guwahati leh Mizoram University chuan nimin khan hmasawnna ngêl­nghet a awm theih dan tur (sustainable development goals) webinar hmangin an sawiho.

August 10, Thawhṭanni zan khan Lalrintluangi w/o Johana, Bilkhawthlir Tuiṭha Veng chu rûl chuk avangin a thi. Bilkhawthlir aṭanga thu dawn danin, Lalrin­tluangi hi a fanute ina léng tura a kal chu rûlin a chuk a, Bilkhaw­thlir damdawi-ina rûl túr thahna hmanga chiu a nih hnuah Kolasib District Hospital panpui ni mah se, a nunna chhan hman a ni lo.