Mizoram hmun hrang hrangah National Deworming Day hman a ni

Nimin February 10 kha National Deworming Day a ni a, Mizoram hmun hrang hrangah hman a ni. Aizawlah chuan KVM High School, Chhinga Vengah hman a ni a, Social Welfare minister Dr K Beichhua'n a hmanpui.

National Deworming Day hmanna inkhawm hi National Health Mission (NHM) mission director Dr Eric Zomawia’n a kaihruai a; minister Dr Beichhua chuan, mihring nuna hun pawimawh ber chu kum 1-19 inkar a ni tih sawiin, "He hun hi zirna leh seilen nana hun pawimawh tak a ni a, mihring puitlin huna kan nih dan tur hriltu pawimawh tak a ni.

Chuvangin, sorkar pawhin ngai pawimawhin, hmalakna hrang hrang a nei a, chu'ng zinga hmalakna pawimawh tak pakhat chu National Deworming Day hi a ni," a ti.

Dr K Beichhua chuan, naupang leh zirlai zawng zawng rúlhût laka an fihlim theih nan National Deworming Day chu India ramah kum 2015 aṭangin state/union territory 11-ah bul ṭan a ni tih sawiin, "A hlâwknate hmuh a nih hnuin ram pumah kum 2016 aṭangin hman chhunzawm a ni," a ti a; Deworming Day chu rûlhût pâi vanga natna hrang hrang thleng thei te, thisen tlâkchhamnate leh naupang ṭhanṭhu um bo nan a nih angin, kum 1-19 inkarte tan kum tin vawi hnih ram pum huapin a ruala rúlhût hlo eitirna tur hun hman a ni tih a sawi.

Social Welfare Minister chuan, Mizoramah February 2016 aṭanga Deworming Day hman ṭan a nih hnuah hmasawnna a awm tih sawiin, "Round hnu hnung ber, August 2019-a neihah naupang sikul kal leh kal lo 96.76%-in rúlhût hlo (Albendazole) an ei a ni," a ti a; kumina NDD-ah Alben­dazole ei vek turin Mizo­rama naupang leh tleirawl kum 1-19 inkarte a chah.

Inkhawmah hian Reproductive and Child Health (RCH) state prog­ramme officer  Dr Lily Chhakchhuak-in NDD chungchanga hriat tur pawimawhte a sawi.

National Deworming Day hi Mizorama district zawng zawngah a ruala hman a ni a, sikul kal leh kal lo, sorkar leh private sikulte huam vekin, naupang leh tleirawlte hnenah rûlhût hlo pek tum a ni. Nimina rúlhût hlo ei thei lo leh ei hman lote tan sorkarin February 17, 2020-ah a bawhzuina hun (Mop up day) a hmang dawn. 

National Deworming Day hi Lungleiah chuan Holy Faith School-ah hman a ni a, Lunglei additional DC R Vanrengpuia'n a hmanpui. R Vanrengpuia chuan, naupangte chu ram tana mi ṭangkai tur leh ram hmasawnna thlen theitu tur an la nih dawn avangin an hriselna sorkarin a ngai pawimawh a, programme ṭha tak tak a kalpui tih a sawi a, "Rúlhût hlo pawh kum tin vawi hnih a thlàwna sem ṭhin a ni a, naupangte'n damdawi hi an ei ngei theih nan nu leh pa te, zirtirtute leh anmahni enkawltute an pawimawh tak zet a ni," a ti.

Inkhawm hi Lunglei senior medical officer Dr Lalrinthangi'n a kaihruai a, National Deworming Day hman a nih dan leh a pawimawhna te, rúlhûtin taksa a khawih chhiat dan te, rúlhût kai theih dan, inthlah pun dante leh invèn dan turte a sawi a ni.

Mamitah chuan Jawahar Novodaya Vidyalaya (JNV) School-ah hman a ni a, bawrhsap Dr Lalrozama'n a hmanpui. Bawrhsap chuan, "Páwn lam thianghlimna bakah, kan ei leh in thianghlim taka kan sawngbawl a ṭul a, inthiarna hmun dik taka kan in thiar loh chuan rúlhût thehdarhtu kan ni thei a ni," a ti a; rúlhûtin taksaah harsatna chi hrang hrang a thlen a, thluak thlengin a khawih pawi theih thu leh, a khát tâwkin rúlhût hlo ei ṭhin a ṭhat thu a sawi.

Kumin February thlaah NDD-ah hian Mamit district-ah chuan sorkar sikula zirlai 10,377, mimal sikula zirlai 9,084, anganwadi centre-a naupang 7,454-te bakah, pre-school 50 leh anganwadi centre-a hming la ziak lo naupang 333, kum 6-19 inkar zirna chawlhsan tawh mi 724 leh college zirlai 261-te hnenah Albendazole pek tum a ni a, an vaiin mi 28,283 an ni.

Lawngtlaiah chuan Chandmary-a Jehovah Jireh HSS-ah hman a ni a, additional DC K Laltlawmlova'n a hawng. Lawngtlai CMO Dr Lalthlamuana kaihhruai inkhawmah hian K Laltlawmlova chuan, naupangte chu faina leh thianghlimna nunpui tura chahin, chu chu hriselna thurûk a nih thu a sawi a; sorkarin sum tam tak sênga an hriselna tur a ruahmansak chu tihlawhtling a, rúlhût hlo ṭha taka ei turin zirlaite a chah.

NDD hi Serchhipah chuan Anganwadi Centre-1 ah hawn a ni a, district bawrhsap Dr Lalzirmawia Chhangte-in a hawng. Serchhip DC chuan, sorkarin mipui hriselna a ngai pawimawh a, hmalakna pawh a ngah tih sawiin, chung zinga pawimawh tak pakhat chu rúlhût pâite enkawl a nih thu a sawi a, "Ei ṭha tinreng ei mah ila, rúlhût kan pai tlat si chuan kan taksa tan kan thil eite'n hna a thawk ṭha tâwk thei lo a, taksaah harsatna a lo awm phah thei a ni," a ti a; naupangte chu thil an ei dawnah fai taka kut sil ṭhin tur leh faina leh thianghlimna ngai pawimawh turin a chah.

NDD hi Siahaah chuan ECM Higher Secondary School-ah district bawrhsap Bhupesh Chaudhary hoin hkan a ni a, Siaha chief medical officer Dr C Hnichho-in a hawnna inkhawm a kaihruai a ni.