Congress-ah rinna an nghat tawh lo - Zoramthanga

MNF president Zoramthanga chuan, Congress party-in MLA bye-election-a hnehna khuangpui an vuak nasat lai taka Aizawl Municipal Corporation (AMC)-a MNF-in hnehna a chang chu mipuiin Congress-ah rinna an nghah tawh lohzia tilangtu niin a sawi.

Zoramthanga hian Inrinni khan Zemabawk North-a MNF zawm thar a lawm luhna inkhawmah thu sawiin, "Congres party hian 'Rorelna dik chu luipui angin luang se,' an tih laiin zu an zuar mup mup a, cheng vaibelchhe sang tél an bâ a, hmasawnna a awm lo a, mipui kan rethei em em a. Hengte hi rorelna dik luipui anga luang chu a ni thei lo," a ti.

MNF President chuan, Mizorama koh­hran hrang hrangte'n missionary an châwm zat chu mi 30,000 vel a nih thu sawiin, "Nuihza siam nana min hman
ṭhin missionary nuai khat tirh chhuah hi kan ram economy-in a zir chuan a har lo. Chhungkaw nuai hnih vel kan awm a, a zatve pawhin tír chhuak ila, nuai khat chu a ni mai ang," a ti a; Pathianin MNF chu a chanchin
ṭha hrilna hmanruaah a hmang dawn niin a sawi.

Zoramthanga chuan, Mizote chu mahni ram luah china cheng leh inrél hrang an ni a, Pathianin a meichher chhi tura a ruatte an nih thu sawiin, "Asia khawmualpuiah hian MNF movement tluka ṭha leh thianghlim a awm lo a, vawiin thleng hian Thlarau Thianghlimin a tlawh zin ber ram kan ni," a ti. Tun aṭanga rei lo têah Congress party chhuahsan rûnpui a thleng dawn niin a sawi bawk.

Aizawl mayor PC Lalhmingthanga pawhin thu sawiin, "Tunah chuan mipuiin MNF bak belh tur an hre tawh lo. Sum leh pai tawktarha inthlanna a tlin ngawt hi kan tum a ni ve lo a, ram hmasawnna tura a taka hna thawh hi kan tum a ni," a ti.