Ei leh in tur him lo hmuchhuak

Health department chuan, ram dang leh state páwn aṭanga ei leh in tur lak lut zingah aisen, Lion energy drink leh Paul's Squash-te chu a him lo niin a tarlang.

Food Safety commissioner Dr K Ropari sawi danin, Myanmar aṭanga lak luh, aisen leh Lion energy drink leh, Silchar aṭanga Mizorama lut, Paul's Squash-te chu Guwahati Food Laboratory-a endik a ni a; mihring tana ṭha lo a tel tih hmuhchhuah a nih avangin, fimkhur turin mipuite a chah.

Dr K Ropari chuan, Mizoramin ei tur endikna laboratory a neih loh avangin ram dang leh state páwn aṭanga ei leh in tur Mizorama lut zawng zawng an endik kim thei lo a, sorkar laipuiin a ngaih pawimawhte chauh an endik thei tih a sawi a; tunah hian RIPANS leh Central Agriculture University-te nena
ṭanghoin state páwn aṭanga thlai lut endik ṭan an tum thu a sawi bawk.

Guwahati-a Food Laboratory-a endik tur pawhin Mizoramin a lak khawmna hmanrua a neih ṭhat loh avangin an endik duh zawng zawng an thawn thei lo tih sawiin, Dr K Ropari chuan, "Sorkar laipui aṭanga thu kan hmuh angin, tuna Mizorama zu zawrh zinga Rum hi Guwahati-a endik turin an inbuatsaih mek a ni. Zu hi a duh apiang tan lei theih a nih loh avangin Excise & Narcotics Commissioner hnena aṭanga phalna neia endik tura duh zat hmuh hunah endik turin thawn a ni ang," a ti.