KHAWTHLIR

BSF Commandant leh Lawngtlai DC

Border Security Force (BSF) 148 Batallion commandant SK Singh chuan tun hnai khan Lawngtlai DC J Hmingthanmawia a hmu a, Lawngtlai district chhung, ramri hrûla chêngte dâwmkânna tura pawimawh a tihte a thlen. BSF Commandant chuan, ramri hrûla chengte'n inbiakpawhna lama harsatna an tawh chungchang te, power supply leh hriselna lama hmalak ngai a tih thute a sawi.

Lok Adalat thu

Kolasib Lok Adalat chu Inrinni khan Kolasib Disrict Court-ah an ṭhu a, thubuai 12 ngaihtuahin, pasarih an chingfel. Thubuai an chinfelah leiba ṭhìnna aṭangin Rs. 29,450 an hmu chhuak a ni.

Mi 5811 man

Vaihlo khuahkhirhna dan COTPA hnuaiah kum 2008 aṭanga December 2015 chhungin dan bawhchhia mi 5811 man an ni a, dan bawhchhia man te
aṭanga pawisa chawi tling khawm hi Rs. 27,00,447 a ni.

SDMAM din

Governor Lt. Gen. Nirbhay Sharma chuan State Disaster Management Authority for Mizoram a din thar a; chairman-ah Chief Minister, vice chairman-ah DMR Minister leh chief executive officer-ah Chief Secretary ruat an ni.

SA Centenary

Salvation Army, India Eastern Territory-in April 26, 2017-a Centenary an lawm tura an inbuatsaihna kal zelah Inrinni khan Aizawl Bazar Corps-a Rust Memorial Hall-ah thil tih dan tur ruahman a ni a, campaigner atan mi 151 an ruat. Campaigner-te hi pawl hrang hrang 45-ah insem darhin, January 24, 2016-ah Central North Division Aizawl City Area corps leh society 45-ah thupui 20 hmangin ṭawngṭai beihpui thlak an tum a ni.